ചെന്നൈ: ദേശീയ ചലച്ചിത്ര പുരസ്കാര ജേതാക്കൾക്ക് ആശംസകൾ നേർന്ന് തമിഴ്നാട് ബിജെപി അദ്ധ്യക്ഷൻ കെ അണ്ണാമലൈ. മികച്ച നടനുള്ള ദേശീയ പുരസ്കാരം നേടിയ നടൻ സൂര്യ, നടി അപർണ ബാലമുരളി, സംഗീത സംവിധായകൻ ജി.വി പ്രകാശ്, തിരക്കഥാകൃത്ത് സുധ കൊംൻഗാര എന്നിവർക്കാണ് ആശംസകൾ നേർന്നത്. പുരസ്കാര പ്രഖ്യാപനത്തിന് പിന്നാലെ ട്വിറ്ററിലൂടെയായിരുന്നു അദ്ദേഹം ആശംസകൾ അറിയിച്ചത്.
സുരരൈ പോട്രിലെ മികച്ച അഭിനയത്തിന് പുരസ്കാരം നേടിയ സൂര്യയ്ക്ക് അഭിനന്ദനങ്ങൾ. സൂര്യയ്ക്ക് മികച്ച നടനുള്ള ദേശീയ പുരസ്കാരം നൽകിയ കേന്ദ്രസർക്കാരിന് നന്ദി അറിയിക്കുകയാണെന്നും അണ്ണാമലൈ ട്വീറ്റ് ചെയ്തു.
മികച്ച സംഗീത സംവിധായകനുള്ള ദേശീയ പുരസ്കാരം സ്വന്തമാക്കിയ ജി.വി പ്രകാശിന് അഭിനന്ദനങ്ങൾ. മികച്ച നടിയ്ക്കുള്ള പുരസ്കാരം നേടിയ അപർണ ബാലമുരളിയ്ക്കും ആശംസകൾ. സൂരരൈ പോട്ര് സിനിമയുടെ തിരക്കഥയ്ക്ക് മികച്ച തിരക്കഥാകൃത്തിനുള്ള ദേശീയ പുരസ്കാരം നേടിയ സുധ കൊൻഗരയ്ക്കും ആശംസകൾ അറിയിക്കുകയാണെന്നും അദ്ദേഹം ട്വീറ്റ് ചെയ്തു. ദേശീയ പുരസ്കാര ജേതാക്കളുടെ ചിത്രങ്ങളും അണ്ണാമലൈ ആശംസകൾക്കൊപ്പം പങ്കുവെച്ചിട്ടുണ്ട്.
