ന്യൂഡൽഹി: 2021 മാർച്ച് മുതൽ 2022 മാർച്ച് വരെയുള്ള ഒരു വർഷ കാലഘട്ടത്തിൽ ഡിജിറ്റൽ, ഓൺലൈൻ ഇടപാടുകൾ 29 ശതമാനം വർദ്ധിച്ചെന്ന് റിസർവ് ബാങ്ക് ഓഫ് ഇന്ത്യ. ആർബിഐ യുടെ ഡിജിറ്റൽ പേയ്മെന്റ് സൂചികയിലാണ് ഇക്കാര്യം വ്യക്തമാക്കുന്നത്. 2021 മാർച്ചിൽ 270.59 ഉം സെപ്തംബറിൽ 304.06 ഉം ആയിരുന്ന സൂചിക 2022 മാർച്ചിൽ 349.3 ആയി.
രാജ്യം ഡിജിറ്റൽ ഇടപാടുകളിൽ എത്രമാത്രം നേട്ടം കൈവരിച്ചെന്നറിയാനായി 2018 മാർച്ചിലാണ് റിസർവ് ബാങ്ക് ഓഫ് ഇന്ത്യ ഡിജിറ്റൽ പേയ്മെന്റ് സൂചിക (ആർബിഐ-ഡിപിഐ) അവതരിപ്പിച്ചത്. അഞ്ച് മാനദണ്ഡ പ്രകാരമാണ് ഡിജിറ്റൽ പേയ്മെന്റ് സൂചിക അളക്കുന്നത്. ഇടപാടുകൾ സജ്ജമാക്കുന്നതിന്റെ അടിസ്ഥാനത്തിൽ 25 ശതമാനം, ഇടപാടിന്റെ ആവശ്യകത പ്രകാരം 10 ശതമാനം, വിതരണഘടകങ്ങളുടെ അടിസ്ഥാനത്തിൽ 15 ശതമാനം തുക തിരികെ അടയ്ക്കുന്നതിന് 45 ശതമാനം ഉപഭോക്തതൃ കേന്ദ്രീകൃതമായി 5 ശതമാനം എന്നിങ്ങനെയാണ് സൂചിക അളക്കുന്നത്. നാലു മാസത്തെ ഇടവേളയിലാണ് സൂചിക പ്രഖ്യാപിക്കുന്നത്.
