നല്ലൊരു പന്തെറിഞ്ഞു; ബാറ്റർക്ക് റൺ കിട്ടിയില്ല; അങ്ങനെ വിട്ടാൽ പറ്റില്ലല്ലോ , ചുമ്മാ നാല് റൺസ് നൽകി ബൗളർ-വീഡിയോ

ഓവൽ: എല്ലാ പന്തുകളിലും സിക്സറടിക്കാൻ ബാറ്റർമാർ ശ്രമിക്കുന്ന ട്വെന്റി ട്വെന്റി ക്രിക്കറ്റിന്റെ കാലത്ത് ഒരു പന്തെങ്കിലും ഡോട്ട് ബോളാകണമെങ്കിൽ എത്രത്തോളം കഷ്ടപ്പെടണമെന്ന് നമുക്കറിയാം. ഒരു കാലത്ത് മെയ്ഡൻ ഓവറുകളാണ് രേഖപ്പെടുത്തിയിരുന്നതെങ്കിൽ ഇന്നത് ഡോട്ട് ബോളുകളായി മാറിയിരിക്കുകയാണ്. അതായത് ഒരു ബൗളർ എത്ര ഡോട്ട് ബോളുകൾ എറിഞ്ഞുവെന്നതാണ് ഇപ്പോൾ കണക്കിൽ കൂട്ടുന്നത്.

ഈ അവസ്ഥയിൽ ഒരു ബൗളർ വെറുതെ ബാറ്റർക്ക് നാല് റൺസ് കൊടുത്താൽ എങ്ങനെയുണ്ടാകും. ടീമംഗങ്ങളും ടീമിന്റെ ആരാധകരും അയാളെ വെറുതെ വിടില്ല. ഇന്നത്തെ ഭാഷയിൽ പറഞ്ഞാൽ ബൗളർ ഉറപ്പായും എയറിലാകും. അങ്ങനെ എയറിൽ നിൽക്കുകയാണിപ്പോൾ സറേയുടെ ബൗളറായ റയാൻ പട്ടേൽ.

വാർവിക് ഷെയറുമായി ഓവലിൽ നടന്ന മത്സരത്തിലായിരുന്നു സംഭവം അരങ്ങേറിയത്. വാർവികിന്റെ സാം ഹെയ്ന് നേരേയായിരുന്നു പട്ടേൽ പന്തെറിഞ്ഞത്. ഓവർ പിച്ച് പന്തിൽ ഉദ്ദേശിച്ച രീതിയിൽ ബാറ്റ് വീശാൻ സാം ഹെ‌യ്‌ന് ‌കഴിഞ്ഞില്ല. പന്ത് നേരേ വന്നത് പട്ടേലിന് നേർക്ക്. കൃത്യമായി ഫീൽഡ് ചെയ്ത പട്ടേൽ സ്ട്രൈക്കിംഗ് എൻഡിലേക്ക് പന്ത് ഒറ്റയേറ് !

Have you ever seen a 4️⃣ like this before? 👀

Ryan Patel fields off his own bowling and sends it straight over Ben Foakes' head 😓#LVCountyChamp live: https://t.co/lBNsyS6zOQ pic.twitter.com/1sw1Mr5WLd

— Rothesay County Championship (@CountyChamp) July 27, 2022

പട്ടേൽ ഉദ്ദേശിച്ചതെന്താണെന്ന് പട്ടേലിന് തന്നെ മനസ്സിലാകാത്ത രീതിയിലായിരുന്നു പന്തിന്റെ പോക്ക്. സ്ട്രൈക്കിംഗ് എൻഡിലെ സ്റ്റമ്പിൽ പന്ത് കൊണ്ടില്ല. അതിന് സമീപത്തു കൂടെ പോലും പോയില്ല. എന്തിനേറെ കീപ്പർക്ക് പോലും എത്തിപ്പിടിക്കാൻ കഴിയാത്ത വിധമായിരുന്നു പട്ടേലിന്റെ ഏറ്. കീപ്പർക്ക് മുകളിലൂടെ പന്ത് ബൗണ്ടറി കടന്നു. ഒരദ്ധ്വാനവുമില്ലാതെ ബാറ്റർക്ക് നാല് റൺസ്. തുടർന്ന് നിരാശനായി നിൽക്കുന്ന പട്ടേലിനേയും വീഡിയോയിൽ കാണാം. എന്തായാലും ഇങ്ങനെയുള്ള ബൗളർമാരുണ്ടെങ്കിൽ വളരെ എളുപ്പം സെഞ്ച്വറിയടിക്കാമല്ലോ എന്നാണ് സാമൂഹ്യമാദ്ധ്യമങ്ങളിലെ പരിഹാസം.