തിരുവനന്തപുരം: അന്തരിച്ച നേതാവ് പി. ബിജുവിന്റെ പേരിലുള്ള ഫണ്ടിൽ തട്ടിപ്പ് നടത്തിയെന്ന ആരോപണം തള്ളി ഡിവൈഎഫ്ഐ ജില്ല സെക്രട്ടറി ഷിജു ഖാൻ. പ്രചരിക്കുന്നത് അടിസ്ഥാന രഹിതമാണെന്ന വാർത്തകളാണെന്ന് ഷിജു ഖാൻ പറഞ്ഞു. സംഭവത്തിൽ ഡിവൈഎഫ്ഐക്കെതിരെ ശക്തമായ വിമർശനം ഉയർന്നുവന്ന പശ്ചാത്തലത്തിലാണ് ആരോപണം തള്ളി സെക്രട്ടറി രംഗത്തുവന്നത്.
സംഭവാന ഇനത്തിൽ പണം പിരിച്ചിട്ടില്ല. ഡിവൈഎഫ്ഐ പ്രവർത്തകർ ജോലി ചെയ്ത് ലഭിക്കുന്ന വരുമാനത്തിൽ നിന്നാണ് പണം സ്വരൂപിച്ചത്. പ്രചരിക്കുന്നത് വ്യാജ വാർത്തകളാണ്. ചില മാദ്ധ്യമങ്ങൾ നുണ പ്രചരിപ്പിക്കുകയാണ്. ഡിവൈഎഫ്ഐയെ അപമാനിക്കാനുള്ള ശ്രമമാണ് നടക്കുന്നത്. റെഡ് കെയർ സെന്ററിനായി പൊതുജനങ്ങളിൽ നിന്നും പണം പിരിക്കാറില്ലെന്നും ഷിജു ഖാൻ പറഞ്ഞു.
ഡിവൈഎഫ്ഐ ജില്ലാ പ്രസിഡന്റ് ഷഹിനെതിരെയാണ് തട്ടിപ്പ് ആരോപണം ഉയർന്നിരിക്കുന്നത്. പിരിച്ച ഫണ്ടിൽ നിന്നും 5 ലക്ഷം രൂപ തട്ടിയെടുത്തെന്നാണ് നേതാവിനെതിരായ പരാതി. സംഭവത്തിൽ സിപിഎം നടപടിയ്ക്കൊരുങ്ങുകയാണെന്നാണ് സൂചന. ഇതിനിടെയാണ് ജില്ലാ സെക്രട്ടറിയുടെ വിശദീകരണം.
