ഹൃദയം തൊടുന്ന ഒരു പെയിന്റിംഗാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. മുൻ എംപിയും നടനുമായ സുരേഷ് ഗോപിയ്‌ക്കു വേണ്ടി വിവേക്.ടി എന്ന കലാകാരൻ ചെയ്ത ഡിജിറ്റൽ പെയിന്റിംഗ് മലയാളികളുടെ ഹൃദയത്തെ സ്പർശിക്കുകയാണ്. ‘മകളെ സ്നേഹിച്ചു കൊതി തീരാത്ത ആ അച്ഛനു വേണ്ടി’ എന്ന അടിക്കുറിപ്പോടു കൂടിയാണ് വിവേക് താൻ ചെയ്ത് പെയിന്റിംഗ് ഫേയ്സ്ബുക്കിൽ പോസ്റ്റ് ചെയ്തിരിക്കുന്നത്. സുരേഷ് ഗോപിയ്‌ക്ക് കുട്ടികൾ എന്നാൽ ജീവനാണ്. പെൺകുട്ടികളെ കാണുമ്പോൾ തന്നെ വിട്ടു പിരിഞ്ഞ മകളെയാണ് അദ്ദേഹത്തിന് ഓർമ്മ വരിക. ഇന്നും ആ മകളുടെ ഓർമ്മയിൽ കഴിയുന്ന സുരേഷ് ഗോപി എന്ന അച്ഛനുള്ള സ്നേഹം കൂടിയാണ് വിവേകിന്റെ പെയിന്റിംഗ്.
സുരേഷ് ഗോപി എന്ന അച്ഛന്റെ കൈകളിൽ മകൾ പുഞ്ചിരിച്ചുകൊണ്ട് പുഷ്പവുമായി നെഞ്ചോട് ചേർന്നിരിക്കുന്നതാണ് വിവേക് ചെയ്ത പെയിന്റിംഗ്. അകാലത്തിൽ തന്നെ വിട്ടുപിരിഞ്ഞ ലക്ഷ്മി എന്ന മകളെ കുറിച്ചോർക്കുമ്പോഴും സംസാരിക്കുമ്പോഴും ഇപ്പോഴും സുരേഷ് ഗോപി എന്ന വാത്സല്യ നിധിയായ അച്ഛന്റെ കണ്ണുകൾ നിറയും. മുപ്പത് വർഷങ്ങൾക്ക് മുമ്പാണ് സുരേഷ് ഗോപിയുടെയും രാധികയുടെയും മകൾ ലക്ഷ്മി ഒന്നര വയസ്സിൽ ഒരു കാറപടകത്തിൽ മരണപ്പെടുന്നത്. മകളെപ്പറ്റി പറയുമ്പോൾ അദ്ദേഹത്തിന്റെ ശബ്ദം ഇടറുന്നത് മലയാളികൾ കാണാറുണ്ട്.
മകളുടെ ഓർമ്മയ്‌ക്കായാണ് ലക്ഷ്മി ചാരിറ്റബിൾ ട്രസ്റ്റ് അദ്ദേഹം രൂപീകരിച്ചത്. മകളുടെ പേരിൽ ഒരുപാട് പേരുടെ കണ്ണീരൊപ്പാൻ സുരേഷ് ഗോപിയ്‌ക്കായിട്ടുണ്ട്. ആരും തിരിഞ്ഞു നോക്കാൻ ഇല്ലാത്തവർക്കും അശരണർക്കും സുരേഷ് ഗോപിയുടെ ദൈവീക കരങ്ങളും ലക്ഷ്മി ചാരിറ്റബിൾ ട്രസ്റ്റും തുണയാകുന്നു. ആ മനുഷ്യന് മകൾ എന്നും നോവുന്ന ഓർമ്മയാണ്. പാപ്പാൻ എന്ന തന്റെ പുതിയ സിനിമയുടെ പ്രമോഷന്റെ ഭാഗമായി ഒരു ചാനലിന് നൽകിയ അഭിമുഖത്തിലും മകളെയോർത്ത് അദ്ദേഹം കണ്ണീരണിയുന്നത് മലയാളികൾ കണ്ടതാണ്. സുരേഷ് ഗോപി എന്ന ‘സൂപ്പർ സ്റ്റാറും” സൂപ്പർ ഹ്യൂമനും’ മാത്രമല്ല, സുരേഷ് ഗോപി എന്ന ‘അച്ഛനും’ മലയാളികളുടെ ഹൃദയത്തിലാണ്.
