ന്യൂഡൽഹി: പുകയില ഉത്പ്പന്നങ്ങളുടെ ഉപയോഗം നിരുത്സാഹപ്പെടുത്താൻ ആരോഗ്യമുന്നറിയിപ്പിൽ മാറ്റം വരുത്തി കേന്ദ്ര ആരോഗ്യമന്ത്രാലയം. പുകയില ഉത്പ്പന്നങ്ങളുടെ പായ്ക്കറ്റിന് പുറത്തെ മുന്നറിയിപ്പിലാണ് ആരോഗ്യമന്ത്രാലയം മാറ്റം വരുത്തിയിരിക്കുന്നത്. ഇതിന്റെ വിജ്ഞാപനം പുറത്തിറങ്ങി. ”പുകയില ഉത്പ്പന്നങ്ങൾ ഉപയോഗിക്കുന്നത് വേദനാജനകമായ മരണത്തിന് കാരണമാകും” എന്ന മുന്നറിയിപ്പോടെയുള്ള പുതിയ ചിത്രമാണ് ഇനി ഉണ്ടാവുക.
നിലവിൽ പുകവലിക്കുന്നത് ആരോഗ്യത്തിന് ഹാനികരം എന്ന മുന്നറിയിപ്പാണ് പുകയില ഉത്പ്പന്നങ്ങളുടെ പായ്ക്കിന് പുറത്ത് നൽകി വരുന്നത്. ചിത്രം സഹിതമാണ് ആരോഗ്യ മുന്നറിയിപ്പ്.
ഡിസംബർ ഒന്ന് മുതൽ ഒരു വർഷ കാലയളവിലേക്ക് പുതിയ മുന്നറിയിപ്പ് പ്രദർശിപ്പിക്കണമെന്നാണ് കമ്പനികൾക്ക് സർക്കാർ നിർദ്ദേശം നൽകിയിരിക്കുന്നത്. ഇന്ത്യയിൽ ഉത്പ്പാദിപ്പിക്കുന്നതും ഇറക്കുമതി ചെയ്യുന്നതുമായ എല്ലാ പുകയില ഉത്പ്പന്നങ്ങൾക്കും ഇത് ബാധകമാണ്
പുകയില ഉത്പ്പന്നങ്ങളുമായി ബന്ധപ്പെട്ട 2008 ലെ നിയമത്തിൽ ഭേദഗതി വരുത്തിയാണ് വിജ്ഞാപനം പുറത്തിറക്കിയത്. വിജ്ഞാപനം 19 ഭാഷകളിൽ വെബ്സൈറ്റിൽ ലഭ്യമാണ്.
2013 ഡിസംബർ ഒന്ന് മുതൽ പുകയില ഉത്പ്പന്നങ്ങളുടെ പായ്ക്കിന് മുകളിൽ വീണ്ടും മുന്നറിയിപ്പ് പുതുക്കണം പുകയില ഉത്പ്പനങ്ങൾ ഉപയോഗിക്കുന്നവർക്ക് ചെറുപ്പത്തിൽ തന്നെ മരണം സംഭവിക്കും എന്ന തരത്തിൽ ദേദഗതി വരുത്താനാണ് നിർദ്ദേശം.
