ചിരഞ്ജീവി ആരാധകർ ഏറെ കാത്തിരിക്കുന്ന ചിത്രമാണ് ഗോഡ്ഫാദർ. മലയാളത്തിലെ ഏറ്റവും വലിയ ഹിറ്റായ ലൂസിഫറിന്റെ തെലുങ്ക് റീമേയ്ക്കാണ് ഗോഡ്ഫാദർ. അതുകൊണ്ട് തന്നെ മലയാളികളുടെ ശ്രദ്ധയും ചിത്രം ഇതിനോടകം പിടിച്ചുപ്പറ്റിയിട്ടുണ്ട്. ബോളിവുഡ് താരം സൽമാൻ ഖാനും പ്രധാന വേഷത്തിലെത്തുന്നു എന്നതാണ് സിനിമയുടെ മറ്റൊരു പ്രത്യേകത. ഇരുവരും ഒന്നിച്ചുള്ള രംഗങ്ങൾക്ക് കാത്തിരിക്കുകയാണ് ആരാധകരും സിനിമാ പ്രേമികളും. ഇപ്പോൾ സമൂഹമാദ്ധ്യമങ്ങളിൽ ചർച്ചയാകുന്നതും ഇരുവരുടെയും ഒരു ചിത്രമാണ്.
നടൻ ചിരഞ്ജീവി ട്വിറ്ററിൽ പോസ്റ്റ് ചെയ്തിരിക്കുന്ന ചിത്രം ഇതിനോടകം വൈറലാവുകയാണ്. ഗോഡ്ഫാദറിൽ സൽമാനൊപ്പം തന്റെ കാലുകൾ ചുവടുവെയ്ക്കുന്നുവെന്നും ഇത് നിങ്ങളുടെ കണ്ണുകൾക്ക് ഒരു വിരുന്നയായിരിക്കുമെന്നും ചിരഞ്ജീവി ട്വിറ്ററിൽ കുറിച്ചിരിക്കുന്നു. നൃത്തം ചെയ്യുന്ന ഇരുവരുടെയും ചിത്രവും അദ്ദേഹം പങ്കുവെച്ചിട്ടുണ്ട്. ഇതോടെ ആരാധകർ ആവേശത്തിലാണ്. ഇരു താരങ്ങളും തമ്മിലുള്ള നൃത്തച്ചുവടുകൾക്കായുള്ള കാത്തിരിപ്പിലാണ് സിനിമാ പ്രേമികൾ.
മോഹൻ രാജ സംവിധാനം ചെയ്യുന്ന ഈ ചിത്രം ചിരഞ്ജീവിയുടെ കരിയറിലെ 153-ാം ചിത്രമാണ് . കോനിഡേല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് ചിത്രം നിർമ്മിക്കുന്നത്. നായികയായി എത്തുന്നത് നയൻതാരയാണ് . സത്യദേവ് കഞ്ചാറാണയും ചിത്രത്തിൽ പ്രധാന കഥാപാത്രത്തെ അവതരിപ്പിച്ചിട്ടുണ്ട്. നീരവ് ഷായാണ് ചിത്രത്തിന്റെ ഛായാഗ്രാഹകൻ. എസ് തമൻ സംഗീത സംവിധാനവും പ്രഭുദേവ നൃത്തസംവിധാനവും നിർവ്വഹിച്ചിരിക്കുന്നു.
Comments