സുരേഷ് ഗോപി- ജോഷി ടീമിന്റെ ‘പാപ്പൻ‘ തിയേറ്ററുകളിൽ എത്തി. ഗംഭീര വരവേൽപ്പാണ് ചിത്രത്തിന് പ്രേക്ഷകർ നൽകി കൊണ്ടിരിക്കുന്നത്. ആദ്യ ഷോ മുതൽ എല്ലാ പ്രദർശന ശാലകളിലും വലിയ തിരക്കാണ് അനുഭവപ്പെടുന്നത്. സുരേഷ് ഗോപി എബ്രഹാം മാത്യു മാത്തൻ എന്ന പോലീസ് ഓഫീസറായി വിവിധ ഗെറ്റപ്പുകളിൽ എത്തുന്ന ചിത്രം ഇൻവെസ്റ്റിഗേറ്റീവ് ഇമോഷണൽ ത്രില്ലർ എന്ന രീതിയിലാണ് പ്രേക്ഷകപ്രീതി നേടുന്നത്. മൗത്ത് പബ്ലിസിറ്റിയിലൂടെ കുടുംബങ്ങൾ വൈകുന്നേരത്തെ ഷോകൾക്ക് ഇടിച്ചു കയറുകയാണ് മിക്ക കേന്ദ്രങ്ങളിലും.
ചിത്രം വൻ വിജയമായ പശ്ചാത്തലത്തിൽ പ്രേക്ഷകർക്ക് നന്ദി അറിയിച്ചു കൊണ്ട് ഫേസ്ബുക്കിൽ സുരേഷ് ഗോപി വീഡിയോ പങ്ക് വെച്ചു. വലിയ ആവേശത്തോടെ ഏറ്റെടുത്ത പ്രോജക്ട് ആണ് പാപ്പൻ എന്ന് സുരേഷ് ഗോപി പറഞ്ഞു. സ്റ്റീവ് മക്ക്വീൻ, റസൽ ക്രോ, അൽ പച്ചീനോ, ടോം ഹാങ്ക്സ് തുടങ്ങിയവരുടെ പ്രകടനങ്ങളുടെ ആത്മാവ് സ്വാംശീകരിക്കാൻ ഈ കഥാപാത്രത്തിലൂടെ താൻ ശ്രമിച്ചിട്ടുണ്ട്. അത് പ്രേക്ഷകർ ഏറ്റെടുത്തതിൽ വലിയ സന്തോഷമുണ്ടെന്ന് സുരേഷ് ഗോപി പറഞ്ഞു.
തന്റെ പരിശ്രമങ്ങൾ ഫലവത്തായി എന്നറിയുന്നതിൽ ഒരു കലാകാരൻ എന്ന നിലയിലുള്ള സന്തോഷം പങ്കു വെക്കുകയാണ്. ഇത് ഒരു വിജയം മാത്രമായല്ല താൻ കാണുന്നത്. ജീവിതത്തിന്റെ മറ്റൊരു ഘട്ടത്തിലേക്കുള്ള തന്റെ പ്രയാണത്തിനുള്ള ഒരു ഇന്ധനമായാണ് ഈ വിജയത്തെ താൻ കണക്കാക്കുന്നത്. തനിക്ക് ഈ വിജയം പുതിയ ഊർജ്ജവും ആർജ്ജവവുമാണ് പകർന്നു നൽകുന്നത്.
മികച്ച അഭിപ്രായത്തിലൂടെ തിയേറ്ററുകളിലേക്ക് കൂടുതൽ പ്രേക്ഷകരെ എത്തിക്കുക എന്ന ദൈവീക നിയോഗത്തിന് കൂടി ചിത്രം കണ്ടവർ കാരണമാകുകയാണ്. ഇത് പൊതുവിൽ മലയാള സിനിമാ രംഗത്തിന് വലിയ ഉണർവ്വാണ് സമ്മാനിക്കുന്നത്. ആ ഉണർവ്വിന് തന്റെയുംയും ജോഷി ഏട്ടന്റെയും സിനിമ നിമിത്തമാകുന്നതിൽ എല്ലാവരോടും സ്നേഹം അറിയിക്കുന്നു. നന്ദി എന്ന രണ്ട് വാക്കുകളിൽ അത് ഒതുക്കാൻ താൻ ആഗ്രഹിക്കുന്നില്ല. എല്ലാവരോടും ഒരുപാട് സ്നേഹം എന്ന് പറഞ്ഞു കൊണ്ടാണ് വീഡിയോ സുരേഷ് ഗോപി അവസാനിപ്പിക്കുന്നത്.
അജയ് ഡേവിഡ് കാച്ചപ്പിള്ളിയാണ് പാപ്പന്റെ ക്യാമറ ചലിപ്പിച്ചിരിക്കുന്നത്. ജെയ്ക്സ് ബിജോയ് സംഗീത സംവിധാനം നിർവ്വഹിച്ചിരിക്കുന്നു. ആർ ജെ ഷാൻ ആണ് ചിത്രത്തിന്റെ തിരക്കഥ രചിച്ചിരിക്കുന്നത്. ഡേവിഡ് കാച്ചപ്പിള്ളിയും ഷരീഫ് മുഹമ്മദുമാണ് പാപ്പന്റെ നിർമ്മാതാക്കൾ.
Comments