തിരുവനന്തപുരം: സുരേഷ് ഗോപിയും സംവിധായകൻ ജോഷിയും ഒരുമിച്ച പാപ്പൻ സിനിമ തിയറ്ററുകളെ ഇളക്കിമറിച്ച് മുന്നേറുകയാണ്. 3.16 കോടി രൂപയാണ് ചിത്രത്തിന്റെ ആദ്യ ദിന കളക്ഷനെന്നാണ് അണിയറ പ്രവർത്തകർ പുറത്തുവിടുന്ന വിവരം. ജോഷി – സുരേഷ് ഗോപി കൂട്ടുകെട്ടിൽ 8 വർഷങ്ങൾക്ക് ശേഷം പുറത്തിറങ്ങിയ ചിത്രമാണിത്. വെളളിയാഴ്ച ആയിരുന്നു റിലീസ്.
ഗ്ലോബൽ റിലീസായിട്ടാണ് ചിത്രം തിയറ്ററുകളിൽ എത്തിയത്. എബ്രഹാം മാത്യു മാത്തൻ എന്ന പോലീസ് വേഷമാണ് സുരേഷ് ഗോപിയുടേത്. മകൻ ഗോകുൽ ഉൾപ്പെടെ വലിയ താരനിരയും ചിത്രത്തിൽ അണിനിരക്കുന്നുണ്ട്. 90 കളിലെ സുരേഷ് ഗോപിയെ പ്രേക്ഷകർക്ക് തിരികെ ലഭിക്കുന്ന ചിത്രമായിരിക്കും ഇതെന്ന് അണിയറ പ്രവർത്തകർ റിലീസിന് മുൻപ് തന്നെ സൂചനകൾ പുറത്തുവിട്ടിരുന്നു. ഇത് ശരിവെക്കുന്നതാണ് ആദ്യ ദിനങ്ങളിലെ പ്രേക്ഷക പ്രതികരണവും.
കനിഹ, നൈല ഉഷ, നീത പിള്ള, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയ താരങ്ങളും സിനിമയിൽ ഉണ്ട്. ശ്രീ ഗോകുലം മൂവീസിന് വേണ്ടി ഗോകുലം ഗോപാലൻ അവതരിപ്പിക്കുന്ന ‘പാപ്പൻ’ ഒരുക്കിയത് ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും ബാനറിലാണ്.
Comments