തിരുവനന്തപുരം: കേരളത്തിലെ വനവാസി സമൂഹം നേരിടുന്ന പ്രശ്നങ്ങൾ കേന്ദ്രമന്ത്രിയുടെ ശ്രദ്ധയിൽപ്പെടുത്തി ബിജെപി. ബിജെപി സംസ്ഥാന ഉപാദ്ധ്യക്ഷൻ ഡോ.കെ.എസ്. രാധാകൃഷ്ണന്റെ നേതൃത്വത്തിലുള്ള സംഘമാണ് കേന്ദ്ര ഗോത്രകാര്യ മന്ത്രി അർജുൻ മുണ്ടയുമായി കൂടിക്കാഴ്ച നടത്തിയത്. കേരളത്തിലെ ബിജെപി നേതാക്കൾക്കൊപ്പം കേന്ദ്രമന്ത്രി വി.മുരളീധരനുമുണ്ടായിരുന്നു.
കേരളത്തിലെ വനവാസി സമൂഹം നേരിടുന്ന പ്രശ്നങ്ങളെക്കുറിച്ച് വസ്തുതാന്വേഷണ സംഘം തയാറാക്കിയ റിപ്പോർട്ട് കേന്ദ്ര മന്ത്രിയ്ക്ക് നൽകി. അട്ടപ്പാടിയടക്കമുള്ള ഊരുകളിൽ നേരിട്ടെത്തി അടിസ്ഥാന സൗകര്യങ്ങൾ വിശദമായി പരിശോധിച്ച ശേഷമാണ് സംഘം മന്ത്രിയ്ക്ക് റിപ്പോർട്ട് സമർപ്പിച്ചത്. വനവാസി മേഖലകളിലെ ആരോഗ്യ രംഗത്ത് മാറ്റങ്ങൾ അനിവാര്യമായതിനാൽ അവിടങ്ങളിലെ സ്ഥിതിഗതികൾ വിലയിരുത്താൻ എംപിമാരുടെ സമിതി രൂപീകരിക്കണമെന്ന് മന്ത്രിയോട് സംഘം ആവശ്യപ്പെട്ടു.
നവജാത ശിശുമരണം, അരിവാൾ രോഗ വ്യാപനം, മദ്യ മാഫിയയുടെ ചൂഷണം തുടങ്ങി നിരവധി പ്രശ്നങ്ങൾ വനവാസി സമൂഹം നേരിടുന്നുണ്ട്. ഊരുകളിലെ ഇത്തരം വിഷയങ്ങൾ സംഘം മന്ത്രിയുടെ ശ്രദ്ധയിൽപ്പെടുത്തി. കടലാസിലും പ്രസംഗങ്ങളിലും മാത്രമൊതുങ്ങുന്ന ഇടതുപക്ഷ സർക്കാരിന്റെ വനവാസിക്ഷേമ നയങ്ങളും വനവാസി സമുദായ ക്ഷേമത്തിനായി അനുവദിച്ച ഫണ്ടുകളുടെ ദുരുപയോഗവും കൂടിക്കാഴ്ചയിൽ വിഷയമായി.
