കൊൽക്കത്ത: കന്നുകാലിക്കടത്ത് കേസിൽ തൃണമൂൽ കോൺഗ്രസ് ബീർഭൂം പ്രസിഡന്റ് അനുബ്രത മണ്ഡലിനോട് ചോദ്യം ചെയ്യലിന് ഹാജരാകാൻ ആവശ്യപ്പെട്ട് സിബിഐ. കൊൽക്കത്ത നിസാം പാലസിലെ സിബിഐ ഓഫീസിൽ തിങ്കളാഴ്ച ഹാജരാകാനാണ് മണ്ഡലിനോട് സിബിഐ ആവശ്യപ്പെട്ടിരിക്കുന്നത്.
പശ്ചിമ ബംഗാൾ മുഖ്യമന്ത്രി മമത ബാനർജിയുടെ അടുത്ത അനുയായിയാണ് അനുബ്രത. 2020 സെപ്റ്റംബർ 21ന് കന്നുകാലിക്കടത്തുമായി ബന്ധപ്പെട്ട് ഒരു സംഘത്തെ സിബിഐ അറസ്റ്റ് ചെയ്തിരുന്നു. ഇവരുടെ ബംഗ്ലാദേശ് ബന്ധവും പിന്നീട് വ്യക്തമായിരുന്നു. ഇവരെ ചോദ്യം ചെയ്തതിൽ നിന്നാണ് അനുബ്രത മണ്ഡലിനെ കുറിച്ചുള്ള വിവരങ്ങൾ സിബിഐക്ക് ലഭിക്കുന്നത്.
പശ്ചിമ ബംഗാളിനെ മമത ബാനർജിയുടെ ഭരണത്തിന്റെ മറവിൽ തൃണമൂൽ കോൺഗ്രസ് നേതാക്കൾ അഴിമതിയുടെ കേന്ദ്രമാക്കി മാറ്റിയിരിക്കുകയാണെന്ന് ബിജെപി ആരോപിച്ചു. നേരത്തേ അഴിമതി കേസിൽ പശ്ചിമ ബംഗാൾ മന്ത്രിയും മമതയുടെ അടുത്ത അനുയായിയുമായിരുന്ന പാർത്ഥ ചാറ്റർജിയെ എൻഫോഴ്സ്മെന്റ് അറസ്റ്റ് ചെയ്തിരുന്നു. ഇതിനെ തുടർന്ന് ഇയാൾക്ക് മന്ത്രി സ്ഥാനം നഷ്ടമായിരുന്നു.
Comments