പത്തനംതിട്ട: ഗവിയിലേക്കുള്ള കെഎസ്ആര്ടിസി ബസിലെ യാത്രക്കാര്ക്ക് കാട്ടുതേനീച്ചയുടെ ആക്രമണം. രാവിലെ 5.30ന് പത്തനംതിട്ടയില് നിന്ന് യാത്ര തിരിച്ച ബസിലെ യാത്രക്കാര്ക്ക് നേരെയാണ് ആക്രമണമുണ്ടായത്. ബസ് ഡ്രൈവര്ക്കും കണ്ടക്ടര്ക്കും ഉള്പ്പെടെ 17 പേര്ക്ക് പരിക്കേറ്റു. ഗവി കഴിഞ്ഞ് കോഴിക്കാനം ഭാഗത്ത് വച്ചാണ് ബസിന് നേരെ തേനീച്ച ആക്രമണമുണ്ടായത്. 55 യാത്രക്കാരും ബസ് ജീവനക്കാരുമാണ് ബസിലുണ്ടായിരുന്നത്. പെട്ടെന്നുണ്ടായ ആക്രമണത്തില് യാത്രക്കാരും ജീവനക്കാരും തേനീച്ചക്കുത്തേല്ക്കുകയായിരുന്നു.
പരിക്കേറ്റ ഏഴ് പേരെ വണ്ടിപ്പെരിയാര് ആശുപത്രിയിലും പത്ത് പേരെ പീരുമേട് താലൂക്ക് ആശുപത്രിയിലും പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്നാണ് വിവരം. വണ്ടിപ്പെരിയാര് ആശുപത്രിയില് ചികിത്സ തേടിയ ഏഴ് പേരും പിന്നീട് ആശുപത്രി വിട്ടു. സംഭവത്തെ തുടര്ന്ന് ബസിലുണ്ടായിരുന്ന യാത്രക്കാരെ സുരക്ഷിതമായി മാറ്റുകയും പരിക്കേറ്റവര്ക്ക് ചികിത്സ ലഭ്യമാക്കുകയും ചെയ്തു.
