കഴിഞ്ഞ ദിവസമായിരുന്നു ഗൂഗിൾ മാപ്പ് നോക്കി വണ്ടിയോടിച്ചവർ തോട്ടിലേക്ക് മറിഞ്ഞ സംഭവമുണ്ടായത്. ഭാഗ്യവശാൽ കാറിലുണ്ടായിരുന്ന കുട്ടിയുൾപ്പെടെയുള്ളവർ രക്ഷപ്പെട്ടു. ഈ സാഹചര്യത്തിൽ ജനങ്ങൾക്ക് ബോധവത്കരണവുമായി എത്തിയിരിക്കുകയാണ് കേരള പോലീസ്.
മുമ്പ് മൈൽ കുറ്റികൾ നോക്കിയും മറ്റ് അടയാളങ്ങൾ പിന്തുടർന്നും വഴി ചോദിച്ചുമായിരുന്നു യാത്രകൾ. ആധുനിക കാലത്ത് വഴിയറിയുന്നതിന് ഗൂഗിൾ മാപ്പ് ഏറെ സഹായകരമായി. എന്നാൽ ഗൂഗിൾ മാപ്പിനും വഴി പിഴയ്ക്കുന്നതിന്റെ തെളിവാണ് ഇത്തരം വാർത്തകളെന്ന് പോലീസ് പറയുന്നു. ഈ അപകടങ്ങൾ കൂടുതലായും മൺസൂൺ കാലങ്ങളിലാണ് റിപ്പോർട്ട് ചെയ്യപ്പെടുന്നത്. പരിചിതമല്ലാത്ത വഴികളിലൂടെ മാപ്പ് നോക്കി സഞ്ചരിക്കുന്നത് പലപ്പോഴും അപകടം സൃഷ്ടിക്കുമെന്നും കേരള പോലീസ് ഓർമ്മിപ്പിച്ചു.
ഗൂഗിൾ മാപ്പ് ഉപയോഗിച്ച് സഞ്ചരിക്കുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ച് കേരള പോലീസ് പങ്കുവെച്ച വസ്തുതകൾ..
* വെള്ളപ്പൊക്കം, പേമാരി തുടങ്ങിയ പ്രകൃതി ദുരന്തങ്ങൾ നേരിടുന്ന അവസരങ്ങളിൽ പലപ്പോഴും റോഡ് ഗതാഗതം തിരിച്ചുവിടാറുണ്ട്. ഇത് ഗൂഗിൾ മാപ്പ് പറഞ്ഞു തന്നെന്ന് വരില്ല.
*ട്രാഫിക് കുറവുള്ള റോഡുകളെ ഗൂഗിൾ മാപ്പ് പറഞ്ഞു തരാറുണ്ട്. എന്നാൽ തിരക്ക് കുറവുള്ള റോഡുകൾ മൺസൂൺ കാലങ്ങളിൽ സുരക്ഷിതമാകണമെന്നില്ല.
* യാത്ര സാധ്യമല്ലാത്ത റോഡുകൾ, വീതി കുറഞ്ഞ് സുഗമമായ സഞ്ചാരം സാധ്യമല്ലാത്ത റോഡുകൾ, അപകടങ്ങൾ നിറഞ്ഞ പാതകൾ എന്നിവയിലൂടെയും ഗൂഗിൾ മാപ്പ് നയിച്ചേക്കാം. അത് ലക്ഷ്യസ്ഥാനത്ത് എത്തിക്കണമെന്നുമില്ല. തോടുകൾ കവിഞ്ഞൊഴുകിയ, മണ്ണിടിഞ്ഞ, മരങ്ങൾ കടപുഴകി വീണ് കിടക്കുന്ന റോഡുകൾ ഗൂഗിൾ മാപ്പിന് തിരിച്ചറിയില്ല.
* മഴക്കാലത്തും രാത്രികാലങ്ങളിലും തീർത്തും അപരിചിതമായ വിജനമായ റോഡുകൾ ഒഴിവാക്കുന്നതാണ് സുരക്ഷിതം.
* രാത്രികാലങ്ങളിൽ ജിപിഎസ് സിഗ്നൽ നഷ്ടപ്പെട്ട് ചിലപ്പോൾ വഴി തെറ്റാനിടയുണ്ട്.
* സഞ്ചാരികൾ കൂടുതൽ തിരയുന്ന റിസോർട്ടുകളും ടൂറിസ്റ്റ് കേന്ദ്രങ്ങളും ഗൂഗിൾ ലൊക്കേഷനിൽ മന:പൂർവ്വമോ അല്ലാതെയൊ തെറ്റായി രേഖപ്പെടുത്തി ആളുകളെ വഴിതെറ്റിക്കുന്നതും ശ്രദ്ധിക്കേണ്ട വസ്തുതയാണ്.
* സിഗ്നൽ നഷ്ടപ്പെടാൻ സാധ്യതയുള്ള റൂട്ടുകളിൽ നേരത്തെ തന്നെ റൂട്ട് സേവ് ചെയ്യാം.
* മാപ്പിൽ യാത്രാ രീതി സെലക്ട് ചെയ്യാൻ മറക്കരുത്. നാലുചക്രവാഹനങ്ങൾ, ഇരുചക്രവാഹനങ്ങൾ, സൈക്കിൾ, കാൽനടയാത്ര, ട്രെയിൻ എന്നിങ്ങനെയുള്ള ഓപ്ഷനിൽ ഏതാണെന്ന് വെച്ചാൽ അത് തെരഞ്ഞെടുക്കുക. ബൈക്ക് പോകുന്ന വഴി ഫോർ വീലർ പോകില്ലല്ലോ..! ഈ കാരണം കൊണ്ടുതന്നെ വഴി തെറ്റാം.
* ഒരു സ്ഥലത്തേക്ക് പോകാൻ രണ്ടുവഴികളുണ്ടാകും. ഈ സന്ദർഭങ്ങളിൽ ഇടയ്ക്ക് നമുക്ക് അറിയാവുന്ന ഒരു സ്ഥലം ‘ആഡ് സ്റ്റോപ്പ്’ ആയി നൽകിയാൽ, വഴി തെറ്റുന്നത് ഒഴിവാക്കാം.
* വഴി തെറ്റിയാൽ ലക്ഷ്യ സ്ഥാനത്തേക്കുള്ള മറ്റൊരു വഴിയാകും ഗൂഗിൾ മാപ്പ് കാണിച്ചു തരിക. എന്നാൽ, ഈ വഴി ചിലപ്പോൾ ഫോർവീലർ അല്ലെങ്കിൽ വലിയ വാഹനങ്ങൾ പോകുന്ന വഴി ആകണമെന്നില്ലെന്നത് ശ്രദ്ധിക്കുക.
* ഗതാഗത തടസം ശ്രദ്ധയിൽപെട്ടാൽ ഗൂഗിൾ മാപ്പ് ആപ്പിലെ contribute എന്ന ഓപ്ഷൻ വഴി റിപ്പോർട്ട് ചെയ്യാം. ഇവിടെ എഡിറ്റ് മാപ്പ് ഓപ്ഷനിൽ add or fix road എന്ന ഓപ്ഷൻ വഴി പ്രശ്നം റിപ്പോർട്ട് ചെയ്യാം. ഗൂഗിൾ മാപ്പ് ഇക്കാര്യം പരിഗണിക്കും. ഇത് പിന്നീട് അതുവഴി വരുന്ന യാത്രക്കാർക്ക് തുണയാകും. തെറ്റായ സ്ഥലനാമങ്ങളും അടയാളപ്പെടുത്താത്ത മേഖലകളുമൊക്കെ ഈ രീതിയിൽ ഗൂഗിളിനെ അറിയിക്കാം.
