ഇടുക്കി: ഇടുക്കി-ചെറുതോണി ഡാമിന്റെ ഷട്ടറുകൾ കൂടുതൽ ഉയർത്തുമെന്ന് മുന്നറിയിപ്പ്. ടാമിന്റെ അഞ്ച് ഷട്ടറുകളും തുറക്കും. ഇടുക്കി അണക്കെട്ടിന്റെ വൃഷ്ടി പ്രദേശത്ത് ശക്തമായ മഴ തുടരുകയാണ്. മുല്ലപ്പെരിയാർ അണക്കെട്ടിൽ നിന്ന് സ്പിൽവേയിലൂടെ ഒഴുക്കുന്ന വെളളത്തിന്റെ അളവ് വർദ്ധിപ്പിച്ചിട്ടുളളതിനാലും ഇടുക്കി അണക്കെട്ടിലേക്കുളള ജലനിരപ്പ് കൂടിവരുന്നു. ഈ സാഹചര്യത്തിൽ ഇന്ന് (08/08/2022) 2 മണി മുതൽ ചെറുതോണി ഡാമിന്റെ ഷട്ടറുകൾ കൂടുതൽ ഉയർത്തുമെന്നാണ് അറിയിപ്പ്.
ചെറുതോണി ഡാമിന്റെ 2, 3, 4 എന്നീ ഷട്ടറുകളാണ് 100 സെന്റി മീറ്റർ വീതം ഉയർത്തുന്നത്. ഇതോടെ 200 ക്യുമെക്സ് വരെ ജലം പുറത്തേയ്ക്കൊഴുകും. ഈ സാഹചര്യത്തിൽ ചെറുതോണി ടൗൺ മുതൽ പെരിയാറിന്റെ ഇരു കരകളിലുമുള്ളവർ അതീവ ജാഗ്രത പുലർത്തണമെന്നാണ് അറിയിപ്പ്. ഇടുക്കി ഡാം തുറന്നതോടെ വെള്ളം ജനവാസ മേഖലയിലേക്ക് എത്തിയിരുന്നു. തടിയമ്പാട് ചപ്പാത്തിൽ റോഡിന് സമീപം വരെ വെള്ളം ഉയർന്നു.
ഇടുക്കി അണക്കെട്ടിലെ ജലനിരപ്പ് നിലവിൽ 2385.18 അടിയാണ്. സെക്കന്റിൽ ഒന്നര ലക്ഷം ലിറ്റർ വെള്ളമാണ് ഒഴുക്കി വിടുന്നത്. ഷട്ടറുകൾ കൂടുതൽ ഉയർത്തുന്നതോടെ സെക്കന്റിൽ മൂന്ന് ലക്ഷം ലിറ്റർ വെള്ളം ഒഴുക്കി വിടും. ജലം തുറന്നു വിടുന്ന സാഹചര്യത്തിൽ ആശങ്കപ്പെടേണ്ടതില്ലെന്നും ജാഗ്രത പുലർത്തിയാൽ മതിയെന്നും ജില്ലാ ഭരണകൂടം അറിയിച്ചു. ആവശ്യമെങ്കിൽ കൂടുതൽ ജലം നാളെയും ഒഴുക്കി വിടും.
Comments