ബർമിംഗ്ഹാം: കോമൺവെൽത്ത് ഗെയിംസിനായി ഇംഗ്ലണ്ടിലെത്തിയ ശ്രീലങ്കൻ താരങ്ങളിൽ ചിലരെ കാണാതായതായി പരാതി. താരങ്ങളും ഒഫീഷ്യൽസുമടക്കം 160 പേരാണ് ഗെയിംസിനായി ഇംഗ്ലണ്ടിലെത്തിയത്.
ജൂഡോ താരം ചമില ദിലാനി, മാനേജർ അസേല ഡിസിൽവ, ഗുസ്തി താരം ഷാനിത് ചതുരംഗ എന്നിവരെ കാണാതായതോടെയാണ് ശ്രീലങ്കൻ ടീം പോലീസിൽ പരാതിനൽകിയത്. അന്വേഷണത്തിൽ ഏഴ് താരങ്ങൾ കൂടി ഒളിവിൽ പോയെന്ന് വ്യക്തമായി. ഇവർ ഒളിച്ചു താമസിക്കുകയാണെന്നാണ് വിവരം.
ഇംഗ്ലണ്ടിൽ ഒളിച്ച് താമസിക്കുന്ന താരങ്ങൾ മറ്റ് തൊഴിലുകൾ കണ്ടെത്തി രാജ്യത്ത് തുടരാനാണ് ശ്രമം. ടീം അംഗങ്ങൾ തിരികെയെത്തുമെന്ന് ഉറപ്പിക്കാൻ താരങ്ങളുടെ പാസ്പോർട്ട് വാങ്ങി അധികൃതർ സൂക്ഷിച്ചിരുന്നു. ഇത് മറികടന്നാണ് ഇവർ ക്യാംപ് വിട്ടത്. വീസയ്ക്ക് ആറ് മാസത്തെ കാലാവധിയുള്ളതിനാൽ ഇവർക്കെതിരെ നടപടിയെടുക്കാനുമാകില്ല.
ഇത് ആദ്യമായല്ല ശ്രീലങ്കയിൽ നിന്നുള്ള കായികതാരങ്ങളെ കാണാതാകുന്നത്. കഴിഞ്ഞ വർഷം ഓസ്ലോയിൽ ഗുസ്തി ചാംപ്യൻഷിപ്പിനെത്തിയ പരിശീലകനെ കാണാതായിരുന്നു. 2014ലെ ഏഷ്യൻ ഗെയിംസിന് ദക്ഷിണകൊറിയയിലെത്തിയ രണ്ട് അത്ലറ്റുകളെയും കാണാതായി. 2004ൽ ജർമനിയിൽ ഹാൻഡ് ബോൾ ടൂർണമെന്റിനെത്തിയ 23 അംഗ ലങ്കൻ ടീമും പിന്നീടു തിരിച്ചുപോയില്ല. ഈ നൂറ്റാണ്ടിലെ ഏറ്റവും വലിയ സാമ്പത്തിക പ്രതിസന്ധിയെത്തുടർന്ന് നിരവധിയാളുകളാണ് ദിനംപ്രതി രാജ്യം വിട്ട് പലായനം ചെയ്യുന്നത്.
Comments