സുരേഷ് ഗോപിയുടെ മാത്രമല്ല, സമീപകാല സിനിമകളിൽ തന്നെ ഏറ്റവും വലിയ ഹിറ്റായി മാറിയ ചിത്രമാണ് പാപ്പൻ. തിയറ്ററിൽ മൂന്നാം വാരത്തിലേയ്‌ക്ക് കടന്നിട്ടും നിലയ്‌ക്കാത്ത ജന പിന്തുണയാണ് പാപ്പന് ലഭിക്കുന്നത്. കേരളത്തിൽ മാത്രമല്ല, പുറത്തും വലിയ സ്വീകാര്യ ചിത്രത്തിന് ലഭിക്കുന്നു. പത്ത് ദിവസം കൊണ്ടു മാത്രം ചിത്രം 31.43 കോടി ആഗോള കളക്ഷൻ നേടിയിരുന്നു. ആര്‍ ജെ ഷാനിന്‍റെ രചനയില്‍ ജോഷി സംവിധാനം ചെയ്‍ത പാപ്പൻ നിറഞ്ഞ സദസ്സിൽ ഓടുമ്പോൾ സക്സസ് ടീസർ പുറത്തുവിട്ടിരിക്കുകയാണ് അണിയറ പ്രവർത്തകർ. സിനിമയുടെ രണ്ടാമത്തെ സക്സസ് ടീസറാണ് പുറത്തു വന്നിരിക്കുന്നത്.
സിനിമയിൽ സുരേഷ് ഗോപിയുടെ മകളായി വേഷമിട്ടിരിക്കുന്ന നിത പിള്ളയെ കേന്ദ്രീകരിച്ചാണ് പുറത്തുവിട്ട രണ്ട് ടീസറുകളും. നിത പിള്ള അവതരിപ്പിക്കുന്ന എഎസ്പി വിന്‍സി എബ്രഹാമും ടിനി ടോം അവതരിപ്പിക്കുന്ന സിഐ സോമന്‍ നായരും തമ്മിലുള്ള രംഗമാണ് രണ്ടാമത്തെ ടീസറിലുള്ളത്. കേസിന്‍റെ അന്വേഷണവുമായി ബന്ധപ്പെട്ട് സഹപ്രവര്‍ത്തകനോട് സംസാരിച്ചു കൊണ്ട് ഇരിക്കുമ്പോൾ സ്ത്രീകളെപ്പറ്റി മോശമായി വാക്കുകൾ ഉപയോഗിച്ച സോമന്‍ നായരെ തിരുത്തുന്ന വിന്‍സി എബ്രഹാമിന്റെ രംഗമാണ് ടീസറിലുള്ളത്. സുരേഷ് ഗോപിയുടെ ഒപ്പം തന്നെ തിയറ്ററിൽ കയ്യടി നേടുന്ന വേഷമാണ് പാപ്പനിൽ നിത പിള്ളയുടേത്.
മാസ്സ് ഫാമിലി ക്രൈം ഇൻവസ്റ്റിഗേഷൻ ത്രില്ലറായി ഒരുക്കിയിരിക്കുന്ന ചിത്രം മലയാളത്തിലിറങ്ങിയ മികച്ച ത്രില്ലറുകളിൽ ഒന്നാണെന്ന് സിനിമാ പ്രേമികൾ പറയുന്നു. എബ്രഹാം മാത്യു മാത്തൻ എന്ന പോലീസ് വേഷമാണ് ചിത്രത്തിൽ സുരേഷ് ഗോപിയുടേത്. മലയാളത്തിൽ ഇറങ്ങിയ ത്രില്ലർ ചിത്രങ്ങൾക്ക് ഇന്നേവരേ ലഭിക്കാത്ത തരത്തിലുള്ള പ്രേക്ഷക സ്വീകാര്യതയും കളക്ഷനുമാണ് പാപ്പന് ലഭിക്കുന്നത്. മലയാളത്തിൽ ഏറ്റവും കൂടുതൽ എക്സ്ട്രോ ഷോസ് ലഭിച്ച ത്രില്ലറുകളിലൊന്നായി മാറി സുരേഷ് ഗോപി-ജോഷി കോംബോയുടെ പാപ്പൻ. സുരേഷ് ഗോപിയ്‌ക്കൊപ്പം മകൻ ഗോകുൽ സുരേഷും ചിത്രത്തിന്റെ ഭാഗമാകുന്നു. കനിഹ, നൈല ഉഷ, ആശ ശരത്, കനിഹ, ചന്ദുനാഥ്, വിജയരാഘവൻ, ഷമ്മി തിലകൻ തുടങ്ങിയ വലിയ താരനിര ചിത്രത്തിൽ അണിനിരക്കുന്നുണ്ട്.
