വലിയ ഒരിടവേളയ്ക്ക് ശേഷം അനുപംഖേർ മലയാളത്തിലേക്ക് തിരിച്ചെത്തുന്നു. ദിലീപിനെ നായകനാക്കി റാഫി സംവിധാനം ചെയ്യുന്ന വോയ്സ് ഓഫ് സത്യനാഥൻ എന്ന ചിത്രത്തിലൂടെയാണ് അനുപംഖേർ വീണ്ടും മലയാള സിനിമയുടെ ഭാഗമാകുന്നത്. ചിത്രത്തിൽ ബോളിവുഡ് താരം സുപ്രധാന വേഷത്തിലെത്തുമെന്നാണ് പുറത്തു വരുന്ന വിവരങ്ങൾ.
1990 ൽ മോഹൻലാലിനെ നായകനാക്കി തമ്പി കണ്ണന്താനം സംവിധാനം ചെയ്ത ഇന്ദ്രജാലം എന്ന സിനിമയിലൂടെയാണ് അനുപംഖേർ മലയാളത്തിൽ അരങ്ങേറ്റം കുറിച്ചത്. ഇതിനോടകം 200-ലധികം ചിത്രങ്ങളിൽ വേഷമിട്ട താരം ഇംഗ്ലീഷ്, ചൈനീസ്,പഞ്ചാബി, തമിഴ്, കന്നട, ബംഗാളി, ഉറുദു, മലയാളം എന്നിങ്ങനെ വിവിധ ഭാഷകളിൽ അഭിനയിച്ചിട്ടുണ്ട്. ജോഷിയുടെ പ്രജയിലും ബ്ലസിയുടെ പ്രണയത്തിലും അദ്ദേഹം വേഷം ചെയ്തിട്ടുണ്ട്. പ്രണയത്തിലെ കഥാപാത്രമാണ് അനുപംഖേറിനെ മലയാളികളുടെ പ്രിയപ്പെട്ട നടനാക്കി മാറ്റിയത്.
ഒമ്പത് വർഷത്തിന് ശേഷമാണ് അനുപംഖേർ വീണ്ടും മലയാളത്തിലേയ്ക്ക് തിരിച്ചെത്തുന്നത്. വിവേക് അഗ്നിഹോത്രി സംവിധാനം ചെയ്ത കശ്മീർ ഫയൽസാണ് അനുപംഖേറിന്റെ അവസാനമായി തിയറ്ററിൽ ഇറങ്ങിയ സിനിമ. മികച്ച പ്രേഷക പ്രശംസ പിടിച്ചുപ്പറ്റിയ ചിത്രത്തിൽ താരം മികച്ച അഭിനയ പ്രകടനമാണ് കാഴ്ചവെച്ചത്. മുംബൈയിലാണ് വോയ്സ് ഓഫ് സത്യനാഥന്റെ ഷൂട്ടിംഗ് പുരോഗമിക്കുന്നത്. ബാദുഷ സിനിമാസിന്റേയും ഗ്രാന്റ് പ്രൊഡക്ഷന്സിന്റേയും ബാനറിൽ എൻ.എം ബാദുഷ, ഷിനോയ് മാത്യു, ദിലീപ്, പ്രിജിൻ ജെ.പി എന്നിവർ ചേർന്നാണ് വോയ്സ് ഓഫ് സത്യനാഥൻ’ നിർമ്മിക്കുന്നത്. റാഫി തന്നെയാണ് സിനിമയുടെ കഥ,തിരക്കഥ,സംഭാഷണം,സംവിധാനം എന്നിവ നിർവഹിച്ചിരിക്കുന്നത്. ദിലീപിനെ കൂടാതെ ജോജു ജോർജ്, സിദ്ധിഖ്, ജോണി ആന്റണി, വീണ നന്ദകുമാർ തുടങ്ങിയവരും പ്രധാന വേഷത്തിൽ എത്തുന്നു.
Comments