കൊച്ചി: ആസാദി കാ അമൃത മഹോത്സവത്തിന്റെ ഭാഗമായി കേരള ഹൈക്കോടതിയും ത്രിവർണങ്ങളാൽ ദീപാലംകൃതമായി. ദേശീയ പതാകയുടെ മൂന്ന് വർണങ്ങളിൽ നിറഞ്ഞുനിൽക്കുന്ന കോടതി സമുച്ചയം കാണാൻ രാത്രിയിൽ നിരവധി സന്ദർശകരും എത്തുന്നുണ്ട്.
സ്വാതന്ത്ര്യ സമര സേനാനികൾക്ക് ആദരവർപ്പിച്ച് സ്മൃതി സ്തൂപവും സ്ഥാപിച്ചിട്ടുണ്ട്. ഹൈക്കോടതിയുടെ മുഴുവൻ നിലകളും ദീപങ്ങൾ കൊണ്ട് അലങ്കരിച്ചിരിക്കുകയാണ്. ഇത്തരത്തിൽ ഹൈക്കോടതി അണിഞ്ഞൊരുങ്ങുന്നത് അപൂർവ്വമായ കാഴ്ചയാണ്. അതുകൊണ്ടു തന്നെ സമീപവാസികൾ ഉൾപ്പെടെ നിരവധി ആളുകളാണ് വൈകിട്ട് ഈ കാഴ്ച കാണാൻ എത്തിയത്.
സ്വാതന്ത്ര്യത്തിന്റെ എഴുപത്തിയഞ്ചാം വാർഷിക ആഘോഷങ്ങളുടെ നിറവിലാണ് രാജ്യം. ആസാദി കാ അമൃത മഹോത്സവത്തിന്റെ ഭാഗമായി രാജ്യത്തെ സർക്കാർ ഓഫീസുകളും ചരിത്ര സ്മാരകങ്ങളും വിനോദസഞ്ചാര കേന്ദ്രങ്ങളും ഉൾപ്പെടെ ത്രിവർണങ്ങളാൽ തിളങ്ങുകയാണ്.
Comments