സുരേഷ് ഗോപി-ജോഷി കൂട്ടുകെട്ടിൽ തിയേറ്ററുകളിലെത്തി ഗംഭീര വിജയം നേടുന്ന പാപ്പൻ എന്ന ചിത്രത്തിലെ വീഡിയോ സോംഗ് പുറത്ത്. ”മായാമഞ്ഞിൻ കൂടാരം” എന്ന റൊമാന്റിക് ഗാനമാണ് അണിയറപ്രവർത്തകർ പുറത്തുവിട്ടത്. ലിബിൻ സ്കറിയ ആണ് ഗാനം ആലപിച്ചിരിക്കുന്നത്. മനു മഞ്ജിത്ത് എഴുതിയ വരികൾക്ക് ജേക്സ് ബിജോയ് ആണ് സംഗീതം നൽകിയിരിക്കുന്നത്. സുരേഷ് ഗോപി ഫേസ്ബുക്കിലൂടെ വീഡിയോ പങ്കുവെച്ചിട്ടുണ്ട്.
സലാം കശ്മീരിന് ശേഷം സുരേഷ് ഗോപി -ജോഷി കൂട്ടുകെട്ടിൽ പിറന്ന ചിത്രമാണ് പാപ്പൻ. സുരേഷ് ഗോപിയുടെ രണ്ടാം വരവിനായി ഏറെ പ്രതീക്ഷയോടെ കാത്തിരുന്ന ആരാധകൻ ഇരുകൈകളും നീട്ടിയാണ് പാപ്പനെ വരവേറ്റത്. 40 കോടിയിലധികം കളക്ഷൻ ബോക്സ് ഓഫീസിൽ നിന്നും ഇതുവരെ സ്വന്തമാക്കിയിട്ടുണ്ട്.
ഒരു ഇടവേളയ്ക്ക് ശേഷം സുരേഷ് ഗോപി പോലീസ് വേഷത്തിൽ എത്തിയ ചിത്രം കൂടിയാണിത്. എബ്രഹാം മാത്യു പാപ്പൻ എന്ന കഥാപാത്രത്തെയാണ് താരം അവതരിപ്പിക്കുന്നത്. അച്ഛനുമായി മകൻ ഗോകുൽ സുരേഷ് സ്ക്രീൻ പങ്കിടുന്ന ആദ്യ ചിത്രമാണ് പാപ്പൻ. സുരേഷ് ഗോപിയുടെ ഒപ്പത്തിനൊപ്പം നിൽക്കാൻ മറ്റൊരു പ്രധാന കഥാപാത്രമായ നൈല ഉഷയ്ക്കും സാധിച്ചിട്ടുണ്ട്.
നീത പിള്ള, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ, സണ്ണി വെയ്ൻ തുടങ്ങിയവരും പ്രധാന വേഷത്തിൽ എത്തുന്നുണ്ട്. ഗോകുലം ഗോപാലൻ, ഡേവിഡ് കാച്ചപ്പിള്ളി, റാഫി മതിര എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ഗോകുലം മൂവീസും ഡ്രീം ബിഗ് ഫിലിംസും ചേർന്നാണ് ചിത്രം തീയേറ്ററുകളിൽ എത്തിക്കുന്നത്.
Comments