ന്യൂഡൽഹി: ‘ആസാദ് കശ്മീർ’ പരാമർശത്തിൽ കെ.ടി ജലീലിനെതിരെ കേസെടുക്കാത്തതിൽ വീണ്ടും പരാതിയുമായി അഭിഭാഷകൻ. ജലീലിനെ അറസ്റ്റ് ചെയ്യണമെന്ന് ആവശ്യപ്പെട്ട് ഡൽഹി ഡിസിപിക്കാണ് വീണ്ടും പരാതി നൽകിയിരിക്കുന്നത്. സുപ്രീം കോടതി അഭിഭാഷകനായ ജി.എസ് മണിയുടേതാണ് പരാതി.
തിലക് മാർഗ് പോലീസ് സ്റ്റേഷനിലും ഡൽഹി പോലീസ് കമ്മീഷണർക്കുമായിരുന്നു ജിഎസ് മണി നേരത്തെ പരാതി നൽകിയത്. എന്നാൽ കഴിഞ്ഞ ഒരാഴ്ചയായി യാതൊരു തരത്തിലുമുള്ള നടപടിയും പരാതിയിൽ സ്വീകരിച്ചില്ല. തുടർന്നാണ് ഡൽഹി ഡിസിപിക്ക് പരാതി സമർപ്പിച്ചത്. ദേശവിരുദ്ധ പരാമർശം നടത്തിയ മുൻ മന്ത്രി കെടി ജലീലിനെതിരെ അറസ്റ്റ് ഉൾപ്പെടെയുള്ള നടപടികൾ സ്വീകരിക്കണമെന്നാണ് പരാതിയിൽ ആവശ്യപ്പെടുന്നത്.
എന്നാൽ പരാതിയുടെ അടിസ്ഥാനത്തിൽ അന്വേഷണം നടക്കുകയാണെന്നും അതിനൊടുവിൽ മാത്രമേ കേസെടുക്കാൻ സാധിക്കുകയുള്ളൂവെന്നുമാണ് തിലക് മാർഗ് പോലീസ് അറിയിക്കുന്നത്.
അതേസമയം വിവാദത്തിന് കാരണമായ പോസ്റ്റ് ഫേസ്ബുക്കിൽ നിന്ന് ജലീൽ പിൻവലിച്ചിരുന്നു. എന്നാൽ പരാമർശത്തിൽ ഉറച്ചുനിൽക്കുകയാണ് എംഎൽഎ ചെയ്തത്. നാടിന്റെ നന്മയെ കരുതി പോസ്റ്റ് പിൻവലിക്കുകയാണെന്ന് പറഞ്ഞ ജലീൽ വിവാദത്തിന് കാരണമായ പരാമർശം തിരുത്താൻ തയ്യാറായിരുന്നില്ല. പോസ്റ്റ് പിൻവലിച്ച സാഹചര്യത്തിൽ പരാതി പിൻവലിക്കാൻ തയ്യാറല്ലെന്ന് അഭിഭാഷകൻ നേരത്തെ വ്യക്തമാക്കിയിരുന്നു. പരാതി നൽകിയത് ഫേസ്ബുക്ക് പോസ്റ്റ് പിൻവലിക്കാൻ അല്ലെന്നും നിയമനടപടി സ്വീകരിക്കാനാണെന്നും അദ്ദേഹം വിശദീകരിച്ചു.
Comments