ന്യൂഡൽഹി: രാജ്യത്തെ പ്രതിപക്ഷ പാർട്ടികൾക്കെതിരെ പരോക്ഷ വിമർശനവുമായി പ്രധാനമന്ത്രി നരേന്ദ്ര മോദി. രാജ്യത്തെ കുറിച്ച് ചിന്തയില്ലാത്തവരാണ് പ്രതിപക്ഷമെന്നും രാജ്യം നേരിടുന്ന വെല്ലുവിളികളോട് നിസ്സംഗത പുലർത്തുന്നവരാണ് അവരെന്നും പ്രധാനമന്ത്രി പറഞ്ഞു.
സർക്കാർ രൂപീകരിക്കുക എന്ന് പറയുന്നത് വളരെ ലളിതമായ കാര്യമാണ്. എന്നാൽ രാഷ്ട്ര നിർമ്മാണം കഠിനമായ പ്രക്രിയയാണ്. ചിലർ എളുപ്പ മാർഗ്ഗം നോക്കുമ്പോൾ ബിജെപി കഠിനാദ്ധ്വാനത്തിന്റെ പാതയിലാണെന്നും പ്രധാനമന്ത്രി പറഞ്ഞു. ‘ഹർ ഘർ ജൽ’ പദ്ധതിയുമായി ബന്ധപ്പെട്ട ചടങ്ങിൽ സംസാരിക്കുകയായിരുന്നു അദ്ദേഹം.
രാഷ്ട്ര നിർമ്മാണ പ്രക്രിയയുടെ കഠിന മാർഗ്ഗം ഏറ്റെടുത്തിരിക്കുന്ന പാർട്ടിയാണ് ബിജെപി. വർത്തമാന കാലത്തിന്റെയും ഭാവിയുടെയും വെല്ലുവിളികൾ ഏറ്റെടുത്ത്, തുടർച്ചയായി അവയെ അഭിസംബോധന ചെയ്യുകയും പരിഹരിക്കാൻ ശ്രമിക്കുകയുമാണ് തങ്ങൾ ചെയ്യുന്നതെന്നും പ്രധാനമന്ത്രി വ്യക്തമാക്കി.
രാജ്യത്തെ കുറിച്ച് യാതൊരു ചിന്തയുമില്ലാത്ത ചിലർ ഇത്തരം വെല്ലുവിളികളെ കണ്ടില്ലെന്ന് നടിക്കുന്നു. വലിയ വാഗ്ദാനങ്ങൾ നൽകാൻ അവർ മിടുക്കരാണ്. എന്നാൽ, അവയൊന്നും ഫലപ്രദമായി പ്രവൃത്തിപഥത്തിൽ എത്തിക്കാൻ അവർക്ക് സാധിക്കുന്നില്ലെന്നും പ്രധാനമന്ത്രി ചൂണ്ടിക്കാട്ടി.
സൗജന്യങ്ങൾ നൽകി തിരഞ്ഞെടുപ്പുകൾ ജയിക്കുന്ന രീതി ജനാധിപത്യത്തിന് ഭൂഷണമല്ലെന്ന് കഴിഞ്ഞയാഴ്ച പ്രധാനമന്ത്രി അഭിപ്രായപ്പെട്ടിരുന്നു. പ്രധാനമന്ത്രിയുടെ നിലപാടിന് സമാനമായ നിരീക്ഷണം സുപ്രീം കോടതിയും നടത്തിയിരുന്നു.
