ന്യൂഡൽഹി: ഓൺലൈൻ ഭക്ഷണ വിതരണ ശൃംഖലയായ സൊമാറ്റോ പ്രോ മെമ്പർഷിപ്പ് നിർത്തലാക്കുന്നതായി പ്രഖ്യാപിച്ചു. കുറച്ചുകാലങ്ങളായി പ്രൊ മെമ്പർഷിപ്പ് ഉള്ള ഉപയോക്താക്കൾക്ക് അത് പുതുക്കുന്നതിനോ, പുതിയ അക്കൗണ്ട് ഉണ്ടാക്കുന്നതിനോ കഴിഞ്ഞിരുന്നില്ല. ഇത് സാങ്കേതിക പ്രശ്നമാണെന്ന് കരുതിയിരുന്ന ഉപഭോക്തക്കളെ ഞെട്ടിച്ചുകൊണ്ടാണ് സൊമാറ്റോ നിർണായക പ്രഖ്യാപനം നടത്തിയത്. പ്രോ അംഗത്വം എടുക്കുന്നതിലൂടെ 99 രൂപയ്ക്ക് മുകളിലുള്ള ഓർഡറുകൾക്ക് ഡെലിവറി ചാർജ് ഇല്ലാതെയുള്ള ഭക്ഷണവിതരണം, കിഴിവുകൾ എന്നീ ആനുകൂല്യങ്ങൾ ലഭിച്ചിരുന്നു.
കാലഹരണപ്പെട്ട പ്രോ അഗത്വം പുതുക്കാൻ ശ്രമിക്കുന്ന ഉപയോക്താക്കൾക്ക് പ്രത്യേക സന്ദേശം നൽകിയാണ് സൊമാറ്റോ വിവരമറിയിക്കുന്നത്. സൊമാറ്റോ പ്രോ പ്രോഗ്രാമിന്റെ ഭാഗമായതിന് നന്ദി. നിങ്ങൾക്കായി പുതിയതും മികച്ചതുമായ അനുഭവത്തിനായി ഞങ്ങൾ പ്രവർത്തിക്കുന്നതിനാൽ അംഗത്വം പുതുക്കുന്നതിനുള്ള ക്രമീകരണങ്ങൾ ലഭ്യമല്ല. ഏറ്റവും പുതിയ ഓഫറുകളെക്കുറിച്ച് അപ്ഡേറ്റ് ചെയ്യാൻ സൊമാറ്റോ ആപ്പ് പരിശോധിക്കാൻ ഞങ്ങൾ നിങ്ങളോട് അഭ്യർത്ഥിക്കുന്നു. എന്നാണ് സന്ദേശം.
സൊമാറ്റോ പ്രോ അംഗത്വം നിർത്തലാക്കിയതിന് പിന്നിലെ കൃത്യമായ കാരണം കമ്പനി ഔദ്യോഗികമായി സ്ഥിരീകരിച്ചിട്ടില്ല.പലവിധ കാരണങ്ങളായി കമ്പനിയ്ക്ക് ഈയിടെ പ്രതിച്ഛായയ്ക്ക് ഭംഗം വന്നിരുന്നു. അതാവും മറ്റെന്തെങ്കിലും ഞെട്ടിക്കുന്ന ഓഫറുമായി എത്താൻ പ്രോ അംഗത്വം നിർത്തലാക്കിയതെന്ന് സോഷ്യൽ മീഡിയ ഉപയോക്താക്കൾ ചൂണ്ടിക്കാണിക്കുന്നു.
Comments