ന്യൂഡൽഹി: ചൈനയിൽ പുറത്തിറക്കുന്നതിന് പിന്നാലെ ഐ ഫോൺ 14 ഇന്ത്യയിലുമെത്തും.
ഒക്ടോബർ അവസാനമോ നവംബർ ആദ്യമോ ഇന്ത്യയിൽ നിന്നുളള ഫോണുകൾ വിപണിയിൽ എത്തും. ഒക്ടോബർ അവസാനമാണ് ദീപാവലി. ഫെസ്റ്റിവൽ സീസണിലെ കച്ചവടം ലക്ഷ്യമിട്ട് വിപണിയിൽ ഇറക്കാനാണ് ആലോചന.
ചൈനയിൽ ഫോൺ പുറത്തിറക്കുന്നതിന് പിന്നാലെ ഇന്ത്യയിലും ഉൽപാദനം ആരംഭിക്കാനാണ് ആപ്പിളിന്റെ പദ്ധതി. ഇരുരാജ്യങ്ങളിലും ഫോണിന്റെ ലഭ്യതയിൽ ഉണ്ടാകാനിടയുളള വിടവ് പരിഹരിക്കാൻ വേണ്ടിയാണിത്. ഇതിന് വേണ്ടി വിതരണക്കാരുമായും നിർമാതാക്കളുമായും ആപ്പിൾ കൂടിയാലോചനകൾ തുടങ്ങിക്കഴിഞ്ഞു.
മുൻപ് ഐ ഫോൺ സീരീസുകൾ പുറത്തിറങ്ങിയ ശേഷം ഇന്ത്യയിൽ ആറ് മുതൽ ഒൻപത് മാസങ്ങൾ വരെ കാത്തിരുന്ന ശേഷമായിരുന്നു ലഭ്യമായിരുന്നത്.
ദീർഘകാലമായി ചൈനയിൽ നിന്നാണ് ആപ്പിൾ ഐഫോൺ ഉൽപാദനം കൂടുതലായി നടത്തിയിരുന്നത്. എന്നാൽ യുഎസ് ഭരണകൂടവും ചൈനയുമായുളള തർക്കങ്ങളും രാജ്യത്തെ പല നഗരങ്ങളിലും കൊറോണ നിയന്ത്രണങ്ങൾ മൂലമുളള ലോക്ഡൗൺ തുടരുന്നതുമാണ് ഇന്ത്യയിൽ ഉൽപാദനം സജീവമാക്കാൻ കമ്പനിയെ പ്രേരിപ്പിച്ചത്. ചൈനയിലെ ഉൽപാദനത്തെ ഇന്ത്യ പ്രോത്സാഹിപ്പിക്കുന്നില്ലെന്ന വസ്തുതയും കമ്പനി പരിഗണിക്കുന്നുണ്ട്.
ഐ ഫോണിന്റെ പ്രധാന നിർമാതാക്കളായ ഫോക്സ് കോൺ ടെക്നോളജി ഗ്രൂപ്പ് ചൈനയിൽ നിന്നും ഫോണിന്റെ ഘടകങ്ങൾ ഇന്ത്യയിലെത്തിച്ച് ഇവിടെ നിർമിക്കുന്നതിന്റെ സാദ്ധ്യതകളെക്കുറിച്ച് നേരത്തെ മുതൽ വിലയിരുത്തി തുടങ്ങിയിരുന്നു. ചെന്നൈയുടെ പുറത്തുളള കമ്പനിയുടെ പ്ലാന്റിലാകും നിർമാണം.
Comments