വാർത്താവിനിമയ രംഗത്ത് വലിയ കുതിച്ച് ചാട്ടത്തിന് വഴിയൊരുക്കുന്ന 5ജി യുഗത്തിലേക്ക് രാജ്യം കടക്കുകയാണ്. ഇന്ത്യയിലെ പ്രമുഖ കമ്പനികളായ റിലയൻസ് ജിയോ, എയർടെൽ എന്നിവ ഈ മാസം അവസാനത്തോട് കൂടി 5ജി സർവീസ് തുടങ്ങുമെന്ന് വ്യക്തമാക്കിയിട്ടുണ്ട്. കേന്ദ്ര സർക്കാർ സെപ്തംബർ 29 ന് ഇന്ത്യ മൊബൈൽ കോൺഗ്രസിന്റെ (ഐഎംസി) ഉദ്ഘാടന വേളയിൽ 5ജി ഔദ്യോഗികമായി അവതരിപ്പിക്കുമെന്നാണ് കരുതുന്നത്. ഇന്ത്യയിൽ 5ജി എത്രയും വേഗം അവതരിപ്പിക്കുമെന്ന് പ്രധാനമന്ത്രി നരേന്ദ്ര മോദി അടുത്തിടെ പറഞ്ഞിരുന്നു. 5ജിയുടെ വേഗത 4ജിയേക്കാൾ 10 മടങ്ങ് അധികമായിരിക്കുമെന്നും അദ്ദേഹം പറഞ്ഞു.
ഘട്ടംഘട്ടമായി 5ജി സേവനം ആരംഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. ആദ്യ ഘട്ടത്തിൽ, തിരഞ്ഞെടുത്ത 13 നഗരങ്ങളിൽ മാത്രമേ അതിവേഗ ഇന്റർനെറ്റ് സേവനം ലഭിക്കൂ. ഏതൊക്കെ നഗരങ്ങളാണ് ആദ്യം 5ജി സേവനം ആരംഭിക്കാൻ പോകുന്നതെന്ന് അറിയാം:
അഹമ്മദാബാദ്, ബെംഗളൂരു, ചണ്ഡീഗഡ്, ചെന്നൈ, ഡൽഹി, ഗാന്ധിനഗർ, ഗുരുഗ്രാം, ഹൈദരാബാദ്, ജാംനഗർ, കൊൽക്കത്ത, ലക്നൗ, മുംബൈ, പൂനെ എന്നീ നഗരങ്ങളിലാണ് ആദ്യ ഘട്ടത്തിൽ 5ജി പ്രവർത്തനം തുടങ്ങുക. എന്നാൽ ഈ നഗരങ്ങളിലെ എല്ലാവർക്കും 5ജി സേവനങ്ങൾ ആദ്യ ഘട്ടത്തിൽ ലഭിച്ചേക്കില്ല. ടെലികോം കമ്പനികൾ ഈ നഗരങ്ങളിലെ തിരഞ്ഞെടുത്ത പ്രദേശങ്ങളിൽ മാത്രമായിരിക്കും ആദ്യം 5ജി സേവനം നൽകുക. അതിനാൽ ഈ നഗരങ്ങളിൽ എല്ലാവരിലേക്കും 5ജി സേവനം എത്താൻ കാലതാമസം ഉണ്ടായേക്കാൻ സാധ്യതയുണ്ട്.
