മഹാരാഷ്‌ട്രയിൽ 75 വയസ്സിന് മുകളിൽ പ്രായമുള്ളവർക്ക് ഇനി മുതൽ സൗജന്യമായി സഞ്ചരിക്കാം. സംസ്ഥാനത്തെ സർക്കാർ ബസ്സുകളിലും എസ് ടി ബസുകളിലുമാണ് സൗജന്യ യാത്ര അനുവദിച്ചിരിക്കുന്നതെന്ന് മഹാരാഷ്ട്ര ട്രാൻസ്‌പോർട്ട് വൈസ് ചെയർമാനും ജനറൽ മാനേജറുമായ ശേഖർ ചാനെ അറിയിച്ചു.
മഹാരാഷ്‌ട്രയിൽ പുതിയ സർക്കാർ അധികാരത്തിൽ എത്തിയ ശേഷം നടപ്പിലാക്കുന്ന ജനകീയ തീരുമാനമാണ് ഇതെന്ന് അഭിപ്രായം ഉയരുന്നുണ്ട്. ആസാദി കാ അമൃത് മഹോത്സവത്തിന്റെ ഭാഗമായി സ്വാതന്ത്ര്യദിന ആഘോഷത്തിന് ശേഷം നടന്ന മന്ത്രിസഭാ യോഗത്തിലാണ് 75-ന് മുകളിൽ പ്രായമുള്ളവർക്ക് സൗജന്യ യാത്രയെ സംബന്ധിച്ച് ഷിൻഡെ പ്രഖ്യാപനം നടത്തിയത്. ജനങ്ങൾക്ക് ഏറെ പ്രയോജനം ചെയ്യുന്ന പദ്ധതി മഹാരാഷ്ട്ര സർക്കാരിന് മികച്ച കയ്യടി നേടിക്കൊടുക്കുകയാണ് ചെയ്യുന്നതെന്ന് അഭിപ്രായ സർവ്വേകൾ പറയുന്നു.
ബസിൽ യാത്ര ചെയ്യുന്നവർ ആധാർ കാർഡ് , പാൻ കാർഡ് , ഡ്രൈവിംഗ് ലൈസൻസ്, വോട്ടേഴ്‌സ് ഐ ഡി തുടങ്ങിയ പ്രായം തെളിയിക്കുന്ന തിരിച്ചറിയൽ രേഖകൾ കാണിച്ച് സൗജന്യ യാത്ര പ്രയോജനപ്പെടുത്താമെന്ന് അറിയിപ്പിൽ പറയുന്നു. സംസ്ഥാനത്തിന് പുറത്തേക്ക് സർവ്വീസ് നടത്തുന്ന ബസ്സുകളിൽ ആനുകൂല്യം ലഭ്യമല്ലെന്നും 65നും 75 നും ഇടയിൽ പ്രായമുള്ളവർക്ക് എം എസ് ആർ ടി സിയിലെ ടിക്കറ്റ് നിരക്കിൽ 50 ശതമാനം ഇളവ് ലഭിക്കുമെന്നും സൂചിപ്പിക്കുന്നു.
Comments