ദുബായ്: ഏഷ്യാ കപ്പ് ട്വൻ്റി 20യ്ക്ക് ആവേശകരമായ തുടക്കം. ഉദ്ഘാടന മത്സരത്തിൽ ശ്രീലങ്കയ്ക്കെതിരെ ഞെട്ടിക്കുന്ന ബൗളിംഗ് പ്രകടനവുമായി അഫ്ഗാനിസ്ഥാൻ. ടോസ് നേടി ബൗളിംഗ് തിരഞ്ഞെടുത്ത അഫ്ഗാനിസ്ഥാൻ, 5 ഓവറിനുള്ളിൽ 3 ശ്രീലങ്കൻ വിക്കറ്റുകൾ പിഴുതു. 5 ഓവറുകൾ പൂർത്തിയാകുമ്പോൾ 3 വിക്കറ്റ് നഷ്ടത്തിൽ 21 റൺസ് എന്ന നിലയിൽ പതറുകയാണ് ശ്രീലങ്ക.
പേസ് ബൗളർ ഫസൽ ഹഖ് ഫറൂഖിയാണ് ശ്രീലങ്കൻ ബാറ്റിംഗ് നിരയിൽ വിനാശം വിതച്ചത്. ഓപ്പണർ കുശാൽ മെൻഡിസിനെയും ചരിത് അസലാങ്കയെയും എണ്ണം പറഞ്ഞ രണ്ട് പന്തുകളിലൂടെ ഫറൂഖി മടക്കി. പാത്തും നിസാങ്കയെ നവീനുൾ ഹഖ് വിക്കറ്റ് കീപ്പറുടെ കൈകളിൽ എത്തിച്ചു. ധനുഷ്ക ഗുണതിലകയും ഭാനുക രജപക്സയുമാണ് നിലവിൽ ക്രീസിൽ.
ക്രിക്കറ്റ് ലോകം ആവേശത്തോടെ കാത്തിരിക്കുന്ന ഇന്ത്യ- പാകിസ്താൻ പോരാട്ടം നാളെയാണ്. ഏറ്റവും കൂടുതൽ തവണ ഏഷ്യൻ ചാമ്പ്യന്മാരായതിന്റെ മുൻതൂക്കവുമായാണ് ഇന്ത്യ ഇറങ്ങുന്നത്. മറുവശത്ത് മികച്ച ടീമിനെയാണ് പാകിസ്താനും അണിനിരത്തുന്നത്.
