നിവിൻ പോളിയെ നായകനാക്കി റോഷൻ ആൻഡ്രൂസ് സംവിധാനം ചെയ്യുന്ന ചിത്രമാണ് ‘സാറ്റർഡേ നൈറ്റ്’. നിവിൻ പോളി മാത്രമല്ല, അജു വർഗീസ്, സൈജു കുറുപ്പ്, സിജു വിത്സൺ എന്നിവർ കേന്ദ്ര കഥാപാത്രങ്ങളായി എത്തുന്ന ചിത്രം സൗഹൃത്തിന്റെ കഥ പറയുന്ന ഒരു ഫീൽഗുഡ് ചിത്രമാണ്. ഇത് അടിവരയിടുന്നതാണ് അണിയറ പ്രവർത്തകർ പുറത്തുവിട്ടിരിക്കുന്ന സിനിമയുടെ ടീസർ. സുഹൃത്തിന്റെ വിവാഹവും പിന്നാലെയുള്ള സംഭവ വികാസങ്ങളുമാണ് കഥാപശ്ചാത്തലമെന്നാണ് ടീസർ സൂചിപ്പിക്കുന്നത്.
കോമഡി എന്റർടൈനറായി ഒരുങ്ങുന്ന ചിത്രത്തിൽ ചിരി പടർത്തുന്ന പഴയ നിവിൻ പോളിയെ കാണാം എന്നാണ് ആരാധകരും സിനിമാ പ്രേമികളും പ്രതീക്ഷിക്കുന്നത്. ‘കായംകുളം കൊച്ചുണ്ണി’ എന്ന വലിയ വിജയത്തിന് ശേഷം നിവിൻ പോളി- റോഷൻ ആൻഡ്രൂസ് കൂട്ടുക്കെട്ടിൽ ഒരുങ്ങുന്ന ചിത്രമാണ് ‘സാറ്റർഡേ നൈറ്റ്’. സാനിയ ഇയ്യപ്പൻ, മാളവിക, പ്രതാപ് പോത്തൻ, ശാരി, വിജയ് മേനോൻ, അശ്വിൻ മാത്യു എന്നിവരും സിനിമയുടെ ഭാഗമാകുന്നു.
നവീൻ ഭാസ്കർ ആണ് സിനിമയുടെ തിരക്കഥ എഴുതിയിരിക്കുന്നത്. ദുബായ്, ബെംഗളൂരു, മൈസൂർ എന്നിവിടങ്ങളിലായി ചിത്രീകരിക്കുന്ന സിനിമ നിർമ്മിച്ചിരിക്കുന്നത് അജിത്ത് വിനായക ഫിലിംസിന്റെ ബാനറിൽ വിനായക അജിത്ത് ആണ്. പൂജാ റിലീസായി സെപ്റ്റംബർ അവസാനം ചിത്രം തിയറ്ററുകളിൽ എത്തും. എബ്രിഡ് ഷൈൻ തിരക്കഥയെഴുതി സംവിധാനം മഹാവീര്യർ ആണ് അവസാനമായി തിയറ്ററിൽ റിലീസ് ചെയ്ത നിവിൻ പോളി ചിത്രം.
