മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ദൃശ്യത്തിന് മൂന്നാം ഭാഗം ഒരുങ്ങുന്നു. ദൃശ്യം 3 ഉണ്ടാകുമെന്ന് നിർമ്മാതാവ് ആൻ്റണി പെരുമ്പാവൂർ സ്ഥിരീകരിച്ചു. സ്വകാര്യ ചടങ്ങിൽ വെച്ച് മോഹൻലാലിന്റെ സാന്നിദ്ധ്യത്തിലായിരുന്നു പ്രഖ്യാപനം.
ദൃശ്യം 3ന് അനുയോജ്യമായ കഥ വന്നാൽ തീർച്ചയായും ചിത്രം സംഭവിക്കുമെന്ന് സംവിധായകൻ ജീത്തു ജോസഫ് നേരത്തെ അറിയിച്ചിരുന്നു. ദൃശ്യം 3ന്റെ ക്ലൈമാക്സ് തന്റെ പക്കലുണ്ടെന്നും അദ്ദേഹം പറഞ്ഞിരുന്നു. അത് മോഹൻലാലുമായി പങ്ക് വെക്കുകയും അദ്ദേഹത്തിന് ഇഷ്ടമാകുകയും ചെയ്തതായും ജീത്തു ജോസഫ് പറഞ്ഞിരുന്നു. നിലവിൽ മോഹൻലാലിനെ നായകനാക്കി ‘റാം’ എന്ന ചിത്രം ഒരുക്കുകയാണ് ജീത്തു ജോസഫ്.
മോഹൻലാൽ- ജീത്തു ജോസഫ് കൂട്ടുകെട്ടിൽ വന്ന ദൃശ്യം മലയാളത്തിലെ ഇൻഡസ്ട്രി ഹിറ്റ് ആയിരുന്നു. ചിത്രത്തിന്റെ രണ്ടാം ഭാഗമായ ദൃശ്യം 2 ഒടിടിയിൽ ഗംഭീര വിജയം നേടിയിരുന്നു. ഇരുവരും ഒരുമിച്ച ട്വെൽവ്ത്ത് മാൻ എന്ന ചിത്രവും ഒടിടിയിൽ മികച്ച വിജയം നേടിയിരുന്നു.
