ക്വാലാലംപൂർ: ഇന്ത്യൻ നാവികസേന കപ്പലായ ഐഎൻഎസ് സുമേധ മലേഷ്യയിലെ പോർട്ട് ക്ലാങ്ങിൽ. ഇന്ത്യൻ നാവികസേനയും റോയൽ മലേഷ്യൻ നേവിയും തമ്മിലുള്ള ഉഭയകക്ഷി ബന്ധം മെച്ചപ്പെടുത്താനും നാവിക സഹകരണം വർദ്ധിപ്പിക്കാനും ആണ് സന്ദർശനമെന്ന് പ്രതിരോധ മന്ത്രാലയം വ്യക്തമാക്കി.
ഐഎൻഎസ് സുമേധയുടെ ക്രൂ അംഗങ്ങൾ റോയൽ മലേഷ്യൻ നേവി ഉദ്യോഗസ്ഥരുമായി ചർച്ച നടത്തുമെന്നാണ് വിവരം. ക്രോസ് ഡെക്ക് സന്ദർശനങ്ങൾ, കായിക മത്സരങ്ങൾ എന്നിവയുൾപ്പെടെ നിരവധി പരിപാടികൾ സംഘടിപ്പിക്കും. ഐഎൻഎസ് സുമേധ പിന്നീട് ആർഎംഎൻ കപ്പലുകൾക്കൊപ്പം മാരിടൈം പാർട്ണർഷിപ്പ് എക്സർസൈസിൽ പങ്കെടുക്കും. സ്കൂൾ കുട്ടികളുടെ സന്ദർശനത്തിനും കപ്പൽ തുറന്നുകൊടുക്കുമെന്ന് ബന്ധപ്പെട്ടവർ അറിയിച്ചു.
ഇരു രാജ്യങ്ങളുടെ നാവികസേനകൾ സംയുക്തമായി വിവിധ മേഖലകളിൽ പ്രവർത്തിക്കുന്നുണ്ട്. ജനങ്ങളുടെ സുരക്ഷ ഉറപ്പാക്കുന്നതിലും സമുദ്ര സുരക്ഷയിലും നിർണായക പങ്ക് വഹിക്കുന്നു.പ്രതിരോധ സുരക്ഷ മേഖലകളിൽ ദൃഢമായ സഹകരണമാണ് ഇരു രാജ്യങ്ങളും പങ്കിടുന്നത്.
ആസാദി കാ അമൃത് മഹോത്സവിന്റെ ഭാഗമായി വിവിധ ഭൂഖണ്ഡങ്ങളിൽ സന്ദർശനം നടത്താൻ നിയോഗിക്കപ്പെട്ടിരുന്ന കപ്പലാണ് ഐഎൻഎസ് സുമേധ. സ്വതന്ത്രമായും ഫ്ലീറ്റ് ഓപ്പറേഷനുകൾക്ക് പിന്തുണയായും ഇതിനെ വിന്യസിച്ചിരിക്കുന്നു. വിശാഖപട്ടണം ആസ്ഥാനമായി പ്രവർത്തിക്കുന്ന ഇന്ത്യൻ നാവികസേനയുടെ ഈസ്റ്റേൺ ഫ്ലീറ്റിന്റെ ഭാഗമാണ് ഐഎൻഎസ് സുമേധ. ഈസ്റ്റേൺ നേവൽ കമാൻഡിലെ ഫ്ലാഗ് ഓഫീസർ കമാൻഡിംഗ്-ഇൻ-ചീഫിന്റെ പ്രവർത്തന കമാൻഡിന് കീഴിലാണ് ഇത് പ്രവർത്തിക്കുന്നത്.
