ആലപ്പുഴ: ഹരിപ്പാട് വീണ്ടും പപ്പടം നൽകാത്തതിന്റെ പേരിൽ കല്യാണ സദ്യയ്ക്കിടെ സംഘർഷം. സംഭവത്തിൽ മൂന്ന് പേർക്ക് പരിക്കേറ്റു. വരന്റെ ബന്ധു മുരളീധരൻ, സുഹൃത്തുക്കളായ ജോഹൻ, ഹരി എന്നിവർക്കാണ് പരിക്കേറ്റത്. ഇവർ ആശുപത്രിയിൽ ചികിത്സ തേടി.
കഴിഞ്ഞ ദിവസമായിരുന്നു സംഭവം. മുട്ടത്തെ സ്വകാര്യ ഓഡിറ്റോറിയത്തിലാണ് വിവാഹം നടന്നത്. സദ്യയ്ക്കിടെ വരന്റെ സുഹൃത്തുക്കളിൽ ചിലർ രണ്ടാമത് പപ്പടം ആവശ്യപ്പെട്ടു. എന്നാൽ രണ്ടാമത് പപ്പടം നൽകാൻ കഴിയില്ലെന്ന് വിളമ്പുന്നവർ പറയുകയായിരുന്നു. ഇതിന് പിന്നാലെ ഇരുവിഭാഗവും തമ്മിൽ വാക്കുതർക്കം ഉണ്ടായി. ഇതാണ് സംഘർഷത്തിൽ കലാശിച്ചത്.
ഓഡിറ്റോറിയത്തിലെ കസേരകൾ ഉപയോഗിച്ചായിരുന്നു ഇരു കൂട്ടരും ഏറ്റുമുട്ടിയത്. സംഭവത്തിൽ പോലീസ് കേസ് എടുത്തിട്ടുണ്ട്.
