എറണാകുളം : കൊച്ചിയിൽ വെള്ളക്കെട്ടിലൂടെ സ്വകാര്യ ബസിന്റെ സാഹസിക യാത്ര. റോഡിൽ നിന്ന ആളുകളെ മുഴുവൻ നനച്ചു കൊണ്ടാണ് ഡ്രൈവർ വെള്ളക്കെട്ടിലൂടെ ബസ് ഓടിച്ചത്. മണപ്പാട്ടി പറമ്പ് ഭാഗത്താണ് സംഭവം.
വെള്ളക്കെട്ട് രൂക്ഷമായ ഭാഗത്താണ് ഡ്രൈവർ അതിവേഗതയിലൂടെ ബസ് ഓടിച്ചത്. സ്ത്രീകൾ ഉൾപ്പെടെ ഉള്ള യാത്രക്കാർ ഈ പ്രദേശത്ത് ഉണ്ടായിരുന്നു. പലരും സമീപത്തെ മതിലുകളിൽ പിടിച്ചാണ് രക്ഷപ്പെട്ടത്. സാധാരണ ഗതിയിൽ ഓഫ് ആകാതെ ഇരിക്കുന്നതിന് വേണ്ടി വെള്ളക്കെട്ടുള്ള ഭാഗത്ത് വേഗത കുറച്ച് വാഹനം ഓടിക്കാറുണ്ട്. ഈ സാഹചര്യത്തിലാണ് ബസ് ഡ്രൈവർ യാത്രക്കാരുടെ ജീവന് ഭീഷണി സൃഷ്ടിക്കുന്ന സാഹസികതയ്‌ക്ക് തുനിഞ്ഞത്. ഇതിന്റെ ദൃശ്യങ്ങൾ സമൂഹ മാദ്ധ്യമങ്ങളിൽ പ്രചരിക്കുന്നുണ്ട്.
റോഡും കാനകളും തിരിച്ചറിയാൻ സാധിക്കാത്ത തരത്തിലാണ് വെള്ളക്കെട്ട് രൂപപ്പെട്ടിരിക്കുന്നതെന്ന് ദൃശ്യങ്ങളിൽ വ്യക്തമാണ്. ഡ്രൈവറുടെ ഭാഗത്ത് നിന്ന് യാതൊരു തരത്തിലുമുള്ള ജാഗ്രത ഉണ്ടായില്ലെന്ന ആരോപണവും ശക്തമായി ഉയരുന്നുണ്ട്.
