എന്തിനും ഏതിനും യന്ത്രസഹായമുള്ള ഒരു യുഗത്തിലാണ് നാമിപ്പോൾ ജീവിക്കുന്നത്. യാത്ര ചെയ്യാനും ഭക്ഷണമുണ്ടാക്കാനും അത് കഴിപ്പിക്കാനും വരെ യന്ത്രങ്ങളുണ്ട്. ഭക്ഷണസാധനങ്ങളുണ്ടാക്കാനുള്ള യന്ത്രങ്ങളുടെ വരവ് അടുക്കളയിലെ താരങ്ങൾക്ക് വലിയ ആശ്വാസമാണ് ഉണ്ടാക്കിയത്.
അമ്മിയുടേയും അരകല്ലിന്റെയും സ്ഥാനം മിക്സി ഏറ്റെടുത്തപ്പോഴും മൺചട്ടികളുടെ സ്ഥാനം സ്റ്റീൽ പാത്രങ്ങൾ കയ്യടക്കിയപ്പോഴും ദോശ കല്ലിൽ ചുട്ട് കഴിക്കുന്ന ശീലം നമ്മൾ മാറ്റിയില്ല. മാവ് ഇൻസ്റ്റന്റായി ലഭിക്കുമെങ്കിലും ദോശ ചുട്ട് തന്നെ കഴിക്കണമായിരുന്നു. എന്നാൽ ഇനി ഒരു സ്വിച്ചിട്ടാൽ നല്ല മൊരിഞ്ഞ ചൂടു ദോശ തീൻമേശയിലെത്തും.
ചെന്നൈ കേന്ദ്രമായി പ്രവർത്തിക്കുന്ന ഇവോഷെഫ് (Evochef) കമ്പനിയാണ് ഇതിന് പിന്നിൽ. ഇസി ഫ്ലിപ് (EC Flip) എന്ന പേരിൽ പുറത്തിറക്കിയിരിക്കുന്ന ഈ മെഷീന് ലോകത്തെ ആദ്യത്തെ സ്മാർട് ദോശ മേക്കർ എന്ന വിശേഷണവും കമ്പനി നൽകി കഴിഞ്ഞു. ദോശ മേക്കറിലെ ടാങ്കിലേക്ക് മാവ് ഒഴിച്ച്, ആവശ്യമുള്ള കനം, മൊരിച്ചിൽ, എണ്ണം തുടങ്ങിയവയ്ക്കുള്ള ബട്ടൺ അമർത്തിയാൽ പ്രിന്ററിൽനിന്ന് പ്രിന്റ് വരുന്നതുപോലെ ദോശകൾ വരും. ഇതുമായി ബന്ധപ്പെട്ടുള്ള ഒരു വീഡിയോ കഴിഞ്ഞ ദിവസം വൈറലായിരുന്നു. ഇതിനു പിന്നാലെ ഇന്റർനെറ്റ് ഉപയോക്താക്കളാണ് ‘ദോശ പ്രിന്റർ’ എന്ന പേരിട്ടത്.
ദോശ പ്രിന്ററിനെക്കുറിച്ച് നിരവധി പ്രതികരണങ്ങളാണ് സമൂഹമാദ്ധ്യമങ്ങളിൽ വരുന്നത്. ‘ഇതിൽ ദോശയുണ്ടാക്കുന്നത് ലളിതവും രസകരവും ആണല്ലോ എന്നതു മുതൽ ഒരു ഉപകാരവുമില്ലാത്ത ഉപകരണമാണിതെന്ന് മുൻവിധിയോടെ അഭിപ്രായം പ്രകടിപ്പിച്ചവരും ഉണ്ട്.
Comments