അഗർത്തല: ബിജെപി ദേശീയ അധ്യക്ഷൻജെ പി നദ്ദയുടെ പൊതുയോഗത്തിനിടെ 25 ഓളം ബിജെപി പ്രവർത്തകരെ ആക്രമിച്ച് പരിക്കേൽപ്പിച്ച സംഭവത്തിൽ കുറ്റാരോപിതരായ 28 പേർക്ക് ത്രിപുര പോലീസ് നോട്ടീസ് അയച്ചു.
ത്രിപുരയിൽ രണ്ടു ദിവസത്തെ സന്ദർശനത്തിനായെത്തിയ ബിജെപി ദേശീയ അദ്ധ്യക്ഷൻ പങ്കെടുത്ത പൊതുസമ്മേളനത്തിനിടയിലാണ് അക്രമം നടന്നത്. സംഭവത്തെ തുടർന്ന് ഒരാളെ സംഭവസ്ഥലത്ത് നിന്നും പോലീസ് അറസ്റ്റ് ചെയ്യുകയും ഇയാൾക്കെതിരെ കേസെടുക്കുകയും ചെയ്തിരുന്നു. ഇതിന് പിന്നാലെ നടന്ന അന്വേഷണത്തിൽ കേസിലെ മറ്റു പ്രതികളായ 28 പേർക്ക് സിആർപിസി 41 എ പ്രകാരം കുറ്റം ചുമത്തി പോലീസ് നോട്ടീസ് അയച്ചു.
സംഭവത്തിന്റെ ഗൗരവം കണക്കിലെടുത്ത് ശക്തമായ അന്വേഷണത്തിന് ഉത്തരവിട്ട മുഖ്യമന്ത്രി മണിക് സാഹ പ്രതികൾക്കെതിരെ മുഖം നോക്കാതെ നടപടിയെടുക്കാൻ പോലീസിനോട് ആവശ്യപ്പെട്ടിരുന്നു.പാർട്ടിയുടെ ദേശീയ അദ്ധ്യക്ഷൻ പങ്കെടുത്ത പരിപാടിക്കിടെ അക്രമം നടത്താൻ ശ്രമിച്ചവരെ നിയമത്തിന് മുന്നിൽ കൊണ്ടുവരാനുള്ള നടപടികൾ സ്വീകരിക്കുമെന്ന് അദ്ദേഹം പറഞ്ഞതിന് പിന്നാലെയാണ് മുഴുവൻ പ്രതികൾക്കും നോട്ടീസ് അയച്ചിരിക്കുന്നത്.
