മണിരത്‌നം അണിയിച്ചൊരുക്കിയ ബ്രഹ്മാണ്ഡ ചിത്രം പൊന്നിയിൻ സെൽവന്റെ രണ്ട് ഭാഗങ്ങളുടെയും ഒടിടി അവകാശം ആമസോൺ പ്രൈം വീഡിയോയ്‌ക്കെന്ന് റിപ്പോർട്ട്. 125 കോടി രൂപയ്‌ക്കാണ് ഇവ വിറ്റതെന്നാണ് പുറത്ത് വരുന്ന വിവരം. ചിത്രത്തിന്റെ തിയേറ്റർ റിലീസിന് ശേഷം ഒടിടിയിൽ പ്രദർശിപ്പിക്കാനുള്ള അനുവാദമാണ് നൽകിയിരിക്കുന്നത്. 500 കോടി മുതൽ മുടക്കിൽ ഒരുങ്ങുന്ന ചിത്രം മണിരത്നത്തിന്റെ ഉടമസ്ഥതയിലുള്ള മദ്രാസ് ടാക്കീസും ലൈക പ്രോഡക്ഷനും ചേർന്നാണ് നിർമിച്ചിരിക്കുന്നത്. ചിത്രത്തിന്റെ രണ്ടാം ഭാഗം വൈകാതെ എത്തും എന്നും റിപ്പോർട്ടുകളുണ്ട്.
ഇതിഹാസ സാഹിത്യകാരൻ കൽക്കിയുടെ പ്രസിദ്ധമായ ചരിത്ര നോവലിനെ ആധാരമാക്കി നിർമ്മിച്ചിരിക്കുന്ന ചിത്രമാണ് പൊന്നിയിൻ സെൽവൻ. പത്താം നൂറ്റാണ്ടിൽ,ചോള ചക്രവർത്തിയുടെ സിംഹാസനത്തിന് നേരിടേണ്ടി വന്ന പ്രശ്‌നങ്ങളും പ്രതിസന്ധികളുമാണ് ചിത്രത്തിൽ ആവിഷ്‌ക്കരിച്ചിരിക്കുന്നത്. .വിക്രം, ഐശ്വര്യാ റായ്, തൃഷ, ജയംരവി, കാർത്തി, റഹ്മാൻ, പ്രഭു, ശരത് കുമാർ, ജയറാം, ഐശ്വര്യ ലക്ഷ്മി, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആന്റണി, അശ്വിൻ കാകുമാനു, റിയാസ് ഖാൻ, ശോഭിതാ ദുലിപാല, ജയചിത്ര തുടങ്ങി വലിയ ഒരു താര നിരതന്നെ ചിത്രത്തിൽ അണിനിരക്കുന്നുണ്ട്.
2012ലാണ് ചിത്രത്തിന്റെ ആദ്യ ഘട്ടം സംവിധായകൻ തുടങ്ങി വച്ചത്. എന്നാൽ സാമ്പത്തിക പ്രതിസന്ധികളെ തുടർന്ന് നീണ്ടുപോയി . അതേസമയം 2015ൽ പൊന്നിയിൻ സെൽവന്റെ കഥയെ ആസ്പദമാക്കി ഒരു ആനിമേഷൻ ചിത്രം പുറത്തിറങ്ങിയിരുന്നു. 32 മണിക്കൂർ ദൈർഘ്യമാണ് ഈ ചിത്രത്തിന് ഉണ്ടായിരുന്നത്. ചെന്നൈയിലുള്ള റെവിൻഡ മൂവി ടൂൺസ് എന്ന ആനിമേഷൻ സ്റ്റുഡിയോ എട്ട് വർഷം കൊണ്ടാണ് ചലച്ചിത്രം നിർമിച്ചത്.
Comments