റായ്പൂര്: കോണ്ഗ്രസ് മുന് അധ്യക്ഷന് രാഹുല് ഗാന്ധി നയിക്കുന്ന ഭാരത് ജോഡോ യാത്രയുടെ പോസ്റ്ററില് സംഘടനയെ അധിക്ഷേപിച്ചതിനെതിരെ ആര്എസ്എസ്. കോണ്ഗ്രസ് അവരുടെ വെറുപ്പിന്റെ അടയാളമാണ് വ്യക്തമാക്കുന്നതെന്ന് ആര്എസ്എസ് സഹ സര്കാര്യവാഹ് ഡോ. മന്മോഹന് വൈദ്യ പറഞ്ഞു. മറ്റുള്ളവര്ക്കെതിരെ വിദ്വേഷം പരത്തി അതിന്റെ പേരില് ആളെ കൂട്ടാന് ശ്രമിക്കുന്നത് രാഷ്ട്രീയ നാടകം മാത്രമാണ്. സംഘടനയ്ക്കെതിരെ നടത്തുന്ന വിദ്വേഷം പ്രചാരണം പാരമ്പര്യമായി കോണ്ഗ്രസ് അനുവര്ത്തിച്ച് പോരുന്നതാണെന്നും വൈദ്യ വിമര്ശിച്ചു.
ഭാരതത്തെ ഏകാത്മകമാക്കുന്നത് ഹിന്ദുത്വമാണെന്ന സത്യം മനസ്സിലാക്കി ജനങ്ങളെ ഒരുമിപ്പിക്കാന് ശ്രമിച്ചാല് അത്തരം പ്രവര്ത്തനങ്ങളെ സ്വാഗതം ചെയ്യുമെന്നും സഹ സര്കാര്യവാഹ് പറഞ്ഞു. സമാജത്തിന്റെയും സമര്പ്പിതരായ സ്വയംസേവകരുടെയും കരുത്തില് സംഘം വളരുകയാണെന്നും മന്മോഹന് വൈദ്യ കൂട്ടിച്ചേര്ത്തു. റായ്പൂരില് നടന്ന അഖില ഭാരതീയ സമന്വയ ബൈഠക്കില് മാദ്ധ്യമങ്ങളുടെ ചോദ്യത്തിന് മറുപടിയായിട്ടായിരുന്നു അദ്ദേഹത്തിന്റെ പ്രതികരണം.
രാഹുല് ഗാന്ധി നടത്തുന്ന ഭാരത് ജോഡോ യാത്രയുടെ പ്രചരാണാര്ത്ഥം തയാറാക്കിയ പോസ്റ്ററിലായിരുന്നു ആര്എസ്എസിനെ അധിക്ഷേപിക്കുന്ന ചിത്രം പ്രത്യക്ഷപ്പെട്ടത്. സംഘടനയുടെ ഗണവേഷത്തിന്റെ (യൂണിഫോം) ഭാഗമായിരുന്ന കാക്കി ട്രൗസര് കത്തിക്കുന്ന ചിത്രമാണ് പോസ്റ്ററില് ഉപയോഗിച്ചിരിക്കുന്നത്. സംഭവത്തിനെതിരെ സാമൂഹ്യമാധ്യമങ്ങളില് പ്രതിഷേധം ഉയര്ന്നിരുന്നു.
ആരംഭം മുതല്തന്നെ ഭാരത് ജോഡോ യാത്ര വിവാദങ്ങളില്പ്പെട്ടിരുന്നു. പ്രധാന സംസ്ഥാനങ്ങള് ഒഴിവാക്കി കോണ്ഗ്രസിന് സ്വാധീനമുള്ള പ്രദേശങ്ങളിലൂടെ മാത്രമാണ് യാത്ര കടന്നുപോകുന്നത്. താരതമ്യേന ചെറിയ സംസ്ഥാനമായ കേരളത്തില് മാത്രം 19 ദിവസമാണ് യാത്ര ചിലവഴിക്കുന്നത്.
