ഭൂമിക്കടിയിൽ നിന്ന് ഭയപ്പെടുത്തുന്ന നിഗൂഢമായ ശബ്ദങ്ങൾ കേൾക്കുന്നതും പെട്ടെന്നൊരു കൈ വന്ന് നമ്മുടെ കാലിൽ പിടിക്കുന്നതുമായ നിരവധി രംഗങ്ങൾ നാം ഹൊറർ സിനിമകളിൽ കാണാറുണ്ട്. ഇതെല്ലാം കണ്ട് നാം ഭയക്കാറുമുണ്ട്. അത് ക്യാമറയുടെയും എഡിറ്റിങ്ങിന്റെയും ട്രിക്കുകളാണെന്ന് നമുക്കെല്ലാവർക്കും അറിയാം. എന്നാൽ ശരിക്കും ഭൂമിക്കടിയിൽ നിന്ന് ഇത്തരത്തിലുള്ള ശബ്ദങ്ങൾ കേട്ടാൽ എന്താകും അവസ്ഥ.
സിനിമാ കഥകളെ വെല്ലുന്ന സംഭവങ്ങളാണ് ഇപ്പോൾ മഹാരാഷ്ട്രയിലെ ഹസോരിയിൽ നടക്കുന്നത്. സെപ്റ്റംബർ 6 മുതൽ പ്രദേശത്ത് ഭൂമിക്കടിയിൽ നിന്ന് നിഗൂഢ ശബ്ദങ്ങൾ കേൾക്കുന്നുണ്ടെന്ന് നാട്ടുകാർ പറയുന്നു. പരിചിതമല്ലാത്ത നിരവധി ശബ്ദങ്ങളാണ് ഇവിടെ നിന്നും കേൾക്കുന്നത്. ഇതോടെ ജനങ്ങളാകെ പരിഭ്രാന്തിയിലാണ്.
ശാസ്ത്രീയമായ വിശദീകരണം ലഭിക്കുന്നതിനായി ഇന്ത്യൻ ഇൻസ്റ്റിറ്റ്യൂട്ട് ഓഫ് ജിയോമാഗ്നെറ്റിസത്തിലെ വിദഗ്ധരോട് പ്രദേശം സന്ദർശിക്കാൻ ജില്ലാ ഭരണകൂടം അഭ്യർത്ഥിച്ചിട്ടുണ്ട്. 1993ൽ 9,700-ഓളം പേരുടെ മരണത്തിനിടയാക്കിയ ഭൂകമ്പം നടന്ന കില്ലാരിയിൽ നിന്ന് 28 കിലോമീറ്റർ അകലെയാണ് ഹസോരി ഗ്രാമം. എന്നാൽ ഉദ്യോഗസ്ഥരുടെ അഭിപ്രായത്തിൽ, അതിനുശേഷം പ്രദേശത്ത് ഭൂകമ്പം ഉണ്ടായിട്ടില്ല.
ലാത്തൂർ ജില്ലാ കളക്ടർ പൃഥ്വിരാജ് ബിപി ഗ്രൗണ്ട് പരിശോധനയ്ക്കായി ഈ ഗ്രാമത്തിലെത്തി നാട്ടുകാരുമായി സംസാരിച്ചു. ജനങ്ങൾ പരിഭ്രാന്തരാകരുതെന്ന് അദ്ദേഹം അഭ്യർത്ഥിച്ചിട്ടുണ്ട്. വരും ദിവസങ്ങളിൽ കൂടുതൽ ആളുകൾ എത്തി പരിശോധന നടത്തും.
Comments