ബെൽഗ്രേഡ്: ലോക റെസ്ലിംഗ് ചാമ്പ്യൻഷിപ്പിൽ ഇന്ത്യയുടെ വിനേഷ് ഫോഗട്ടിന് വെങ്കലം. സ്വീഡന്റെ ജോന മാൽമ്രെനോഫിനെ പ്ലേ ഓഫിൽ 8-0 എന്ന സ്കോറിൽ പരാജയപ്പെടുത്തിയാണ് ഫോഗട്ട് ഇന്ത്യക്ക് വേണ്ടി മെഡൽ നേടിയത്. 53 കിലോ വിഭാഗത്തിലാണ് നേട്ടം.
കാൽമുട്ടിനേറ്റ പരിക്ക് വകവെക്കാതെയായിരുന്നു ഫോഗട്ട് മത്സരിച്ചത്. ഒരു ഘട്ടത്തിൽ വേദന പ്രകടനത്തെ ബാധിക്കും എന്ന തോന്നലുണ്ടായി എങ്കിലും, വേദനയെ അവഗണിച്ച് പൊരുതിയ ഫോഗട്ട് ഒടുവിൽ മെഡൽ സ്വന്തമാക്കുകയായിരുന്നു.
മത്സരത്തിന് ശേഷം വേദന സഹിക്കാനാകാതെ കോച്ചിന്റെ ചുമലിൽ താങ്ങിയാണ് ഫോഗട്ട് മടങ്ങിയത്. 2019ലെ ലോക റെസ്ലിംഗ് ചാംപ്യൻഷിപ്പിലും വിനേഷ് ഫോഗട്ട് വെങ്കലം നേടിയിരുന്നു. രണ്ട് ലോക ചാമ്പ്യൻഷിപ്പുകളിൽ മെഡൽ നേടുന്ന ആദ്യ ഇന്ത്യൻ റെസ്ലറാണ് ഫോഗട്ട്. കഴിഞ്ഞ കോമൺവെൽത്ത് ഗെയിംസിൽ വിനേഷ് ഫോഗട്ട് ഇന്ത്യക്കായി സ്വർണ മെഡൽ നേടിയിരുന്നു.
