ഇസ്ലാമാബാദ്: ഏഷ്യാ കപ്പിലെ പരാജയത്തിന് പിന്നാലെ മോശം ഫോമിന്റെ പേരിലും പാകിസ്താൻ ക്യാപ്ടൻ ബാബർ അസമിനെതിരായ വിമർശനങ്ങൾ തുടരുന്നു. മികച്ച ഫോമിൽ കളിച്ചു വന്ന അസമിനെ ക്യാപ്ടൻസിയുടെ സമ്മർദ്ദം ബാധിച്ചിട്ടുണ്ടാകാമെന്ന് മുൻ പാകിസ്താൻ വിക്കറ്റ് കീപ്പർ കമ്രാൻ അക്മൽ അഭിപ്രായപ്പെട്ടു. പാകിസ്താന്റെ ക്യാപ്ടൻ പദവി ഇപ്പോൾ ഏറ്റെടുക്കരുതെന്ന് അസമിനെ താൻ ഉപദേശിച്ചിരുന്നതായും അക്മൽ യൂട്യൂബ് ഷോയിൽ വെളിപ്പെടുത്തി.
ഇത് ക്യാപ്ടൻസി ഏറ്റെടുക്കാനുള്ള ശരിയായ സമയമല്ല. അടുത്ത 2-3 വർഷം കൂടി കളിയിൽ ശ്രദ്ധ കേന്ദ്രീകരിക്കൂ. ആദ്യം വിരാട് കോഹ്ലിയുടെയും സ്റ്റീവ് സ്മിത്തിന്റെയും നിലവാരത്തിൽ എത്താൻ ശ്രമിക്കൂ. ഇതായിരുന്നു ബാബർ അസമിന്, ക്യാപ്ടൻസി ഏറ്റെടുത്ത സമയത്ത് താൻ നൽകിയ ഉപദേശമെന്ന് അക്മൽ പറഞ്ഞു.
ഏഷ്യാ കപ്പിൽ പാകിസ്താൻ ഫൈനലിൽ എത്തിയെങ്കിലും, ബാബർ അസമിന്റെ ഫോമില്ലായ്മയും ക്യാപ്ടൻ എന്ന നിലയിലെ തെറ്റായ തീരുമാനങ്ങളും വലിയ തോതിൽ വിമർശിക്കപ്പെട്ടിരുന്നു. ട്വന്റി 20 ലോകകപ്പിന് തയ്യാറെടുക്കുന്ന പാകിസ്താന് കനത്ത തിരിച്ചടിയാണ് ബാബർ അസമിന്റെ മോശം ഫോം.
