എല്ലാ പ്രായത്തിലുള്ളവരെയും ബാധിക്കുന്ന ഒരു ആരോഗ്യ പ്രശ്നമാണ് മുട്ടുവേദന. രാവിലെ കിടക്കയിൽ നിന്ന എഴുന്നേൽക്കുമ്പോൾ മുതൽ ചിലർക്കിത് അനുഭവപ്പെടാറുണ്ട്. അൽപദൂരം നടക്കുകയോ പടികൾ കയറുകയോ ചെയ്യുമ്പോഴാണ് വേദന വീണ്ടും കൂടുന്നത്. ഇത് കാരണം സമാധാനത്തോടെ ഒരു ജോലി ചെയ്യാനോ ആഘോഷങ്ങളിൽ പങ്കെടുക്കാനോ പലർക്കും സാധിക്കാറില്ല.
പരിക്കിന്റെ ഫലമായോ, സന്ധിവാതം, അണുബാധ തുടങ്ങിയവ മൂലമാണ് മുട്ടുവേദന അനുഭവപ്പെടുന്നത്. ഇത് ചികിത്സിക്കാതിരിക്കുന്നതോടെ വേദനയും വർദ്ധിക്കും. ചിലർക്ക് മുട്ടുവേദന പെട്ടെന്ന് ഭേദമാകും, എന്നാൽ മറ്റ് ചിലർക്ക് ഫിസിയോതെറാപ്പി പോലുള്ള ചികിത്സ ആവശ്യമാണ്. നാട്ടുചികിത്സയിലൂടെ മുട്ടുവേദനയ്ക്ക് പ്രതിവിധി കാണുന്നവരുമുണ്ട്. എന്നാൽ ചിലർക്ക് നിർബന്ധമായും സർജറി വേണ്ടിവരും.
മാറാത്ത മുട്ടുവേദന തന്നെയാണ് ഇതിന്റെ പ്രധാന ലക്ഷണം. വീക്കം, കാഠിന്യം, ചുവപ്പ്, ചൂട്, ബലഹീനത, അസ്ഥിരത, പോപ്പിങ്, ലോക്കിംഗ് (കാൽമുട്ട് മടക്കാനോ നിവർത്താനോ കഴിയാത്ത അവസ്ഥ) തുടങ്ങിയവയും ഇതിന്റെ ലക്ഷണങ്ങളാണ്.
മുട്ട് വേദന മൂർച്ഛിക്കാതിരിക്കാൻ ഏറെ കാര്യങ്ങൾ ശ്രദ്ധിക്കേണ്ടതുണ്ട്. പ്രായം കൂടുമ്പോൾ മുട്ടിന്റെ ഘടനയിൽ വ്യത്യാസം വരാൻ സാധ്യതയുണ്ട്. അത്തരത്തിൽ ഘടനയിൽ വ്യത്യാസമുണ്ടോയെന്ന് ഇടയ്ക്കിടെ പരിശോധിക്കണം. മുട്ടിന് വളവുണ്ടെങ്കിലും ശ്രദ്ധിക്കണം.
നടക്കാനോ, പടികൾ കയറാനോ, ഇറങ്ങാനോ ഉള്ള ബുദ്ധിമുട്ടെല്ലാം മുട്ടിന്റെ ചലനം പരിമിതമാക്കുന്ന അവസ്ഥയാണ്. ഈ വിഷമതകൾ നേരിടുന്നുവെങ്കിൽ തീർച്ചയായും കരുതലെടുക്കണം. ശരീരം വേദന അനുഭവപ്പെടുമ്പോൾ വേദനസംവാരികൾ ഉപയോഗിക്കുന്നത് സാധാരണയാണ്. എന്നാൽ വേദനസംഹാരികൾ ഉപയോഗിച്ചിട്ടും വേദന മാറിയില്ലെങ്കിൽ ഉറപ്പായും പരിശോധന നടത്തണം.
പെട്ടെന്നുള്ള മുട്ടുവേദന മാറ്റാനായി ഐസ്പാക്ക്, ചൂടുപിടിക്കൽ എന്നീ മാർഗങ്ങൾ പരീക്ഷിക്കാവുന്നതാണ്. ഐസ്ക്യൂബുകൾ ഒരു തുണിയിൽ കെട്ടി വേദനയുള്ള ഭാഗത്ത് അമർത്തിവെക്കുന്നതാണ് ഐസ്പാക്ക്. നീരുണ്ടെങ്കിൽ ഏറ്റവും ഫലപ്രദമായ മാർഗമാണ് ഇത്. കാൽമുട്ടിന് നീരില്ലെങ്കിൽ തുണി ചൂടുവെള്ളത്തിൽ മുക്കിയോ ഹോട്ട്ബാഗ് ഉപയോഗിച്ചോ ചൂടുപിടിക്കാം.
Comments