ന്യൂഡൽഹി:പ്രധാനമന്ത്രിയുടെ ജന്മദിനം വ്യത്യസ്തമാക്കാനൊരുങ്ങി ഡൽഹിയിലെ റെസ്റ്റോറന്റ്. കോണാട്ട് പ്ലേയ്സിലെ ആർഡർ 2.1 എന്ന റെസ്റ്റോറന്റിൽ നാളെ മുതൽ ’56 ഇഞ്ച് മോദിജി താലി’ രുചിക്കാനാകും. 56 ഇനങ്ങളാണ് സ്പെഷ്യൽ താലിയിലുള്ളത്. വെജ്, നോൺ വെജ് ഇനങ്ങളിൽ താലി കഴിക്കാനാകുമെന്ന് റെസ്റ്റോറന്റ് ഉടമ സുമിത് കളറ വ്യക്തമാക്കി.
മോദിയുടെ ജന്മദിനമായ സെപ്റ്റംബർ 17 മുതൽ 26 വരെ ഉപഭോക്താക്കൾക്കായി പ്രത്യേക ഓഫറുകളും റെസ്റ്റോറന്റ് നൽകിയിട്ടുണ്ട്. രണ്ട് പേരുടെ കൂട്ടത്തിൽ ആരെങ്കിലും ഒരാൾ 40 മിനിറ്റിനുള്ളിൽ 56 ഇനങ്ങളുള്ള താലി കഴിച്ച് പൂർത്തിയാക്കിയാൽ 8.5 ലക്ഷം രൂപ സമ്മാനം നൽകുമെന്ന് സുമിത് കളറ പറഞ്ഞു. സ്പെഷ്യൽ താലി കഴിക്കാനെത്തുന്നവരിൽ നിന്നും ഭാഗ്യശാലിയെ കണ്ടെത്തി സൗജന്യമായി കേദാർനാഥിലേക്ക് യാത്ര അനുവദിക്കുമെന്നും റെസ്റ്റോറന്റ് അറിയിച്ചു. പ്രധാനമന്ത്രിയുടെ പ്രിയപ്പെട്ട സ്ഥലങ്ങളിൽ ഒന്നാണ് കേദാർനാഥ്. അതുകൊണ്ടാണ് ഇത് തിരഞ്ഞെടുത്തതെന്നും കളറ പറഞ്ഞു.
രാജ്യത്തിന്റെ അഭിമാനമാണ് നരേന്ദ്ര മോദിയെന്നും വളരെയധികം ബഹുമാനിക്കുന്നുവെന്നും സുമിത് കളറ പറഞ്ഞു. അദ്ദേഹത്തിന്റെ ജന്മദിനത്തിൽ വ്യത്യസ്തമായി സമ്മാനം നൽകാൻ ആഗ്രഹിച്ചിരുന്നതായും കളറ സൂചിപ്പിച്ചു.മോദി താലി രുചിക്കാൻ റെസ്റ്റോറന്റിൽ എത്തണമെന്നാണ് ഉടമയുടെ ആഗ്രഹം. എന്നാൽ സുരക്ഷാ മുൻനിർത്തി അദ്ദേഹത്തിനെത്താൻ കഴിയില്ല. ആയതിനാൽ 56 ഇഞ്ച് മോദിജി താലി അദ്ദേഹത്തിന്റെ ആരാധകർക്ക് വേണ്ടിയാണെന്നും കളറ വ്യക്തമാക്കി.
Comments