ന്യൂഡൽഹി: ജന്മദിനാംശസകൾക്ക് നന്ദി പറഞ്ഞ് പ്രധാനമന്ത്രി നരേന്ദ്ര മോദി. ഒരോ ആശംസയും കൂടുതൽ ഊർജ്ജസ്വലനായി മുന്നോട്ട് പോകുന്നതിനുള്ള കരുത്ത് പകരുന്നതാണെന്ന് പ്രധാനമന്ത്രി പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
ജനങ്ങളുടെ സ്‌നേഹത്തിന് മുൻപിൽ താൻ കീഴ്‌പ്പെട്ടിരിക്കുന്നു. ജന്മദിനത്തിൽ ആശംസകൾ അറിയിച്ച ഒരോരുത്തർക്കും നന്ദി. രാജ്യത്തിനായി കൂടുതൽ കഠിന പ്രയത്‌നം നടത്താൻ ഈ ആശംസകൾ തനിക്ക് പ്രചോദനം നൽകും. വിവിധ സാമൂഹ്യസേവനങ്ങൾക്കായി ഈ ദിനം ഉഴിഞ്ഞുവെച്ച എല്ലാവർക്കും നന്ദി. നിങ്ങളുടെ പ്രവർത്തനങ്ങൾ പ്രശംസനീയമാണെന്നും പ്രധാനമന്ത്രി ട്വീറ്റ് ചെയ്തു.
ഇന്നത്തെ ദിനം സാമ്പത്തിക, സാമൂഹിക, പാരിസ്ഥിത പരിപാടികൾക്ക് വേണ്ടിയാണ് മാറ്റിവെച്ചത്. കൂട്ടായി പ്രവർത്തിച്ചാൽ സുസ്ഥിര വികസനം എന്ന ആശയം പൂർത്തീകരിക്കാൻ നമുക്ക് സാധിക്കുമെന്നകാര്യത്തിൽ വിശ്വാസമുണ്ട്. വരും ദിവസങ്ങളിൽ കൂടുതൽ കൂടുതൽ കഠിനമായി പ്രവർത്തിക്കണമെന്നും അദ്ദേഹം പറഞ്ഞു. രാഷ്‌ട്രപതി ദ്രൗപതി മുർമു, ഉപരാഷ്‌ട്രപതി ജഗദീപ് ധൻകർ തുടങ്ങിയവരുടെ ആശംസ ട്വീറ്റുകൾ റീ ട്വീറ്റ് ചെയ്ത് പ്രധാനമന്ത്രി പ്രത്യേകം നന്ദി പറയുകയും ചെയ്തിട്ടുണ്ട്.
