കൊതുകു ശല്യം ഒഴിവാക്കാൻ വഴികൾ തേടുന്നവരാണ് നമ്മൾ എല്ലാവരും. മഴക്കാലത്താണ് കൊതുകുകളുടെ ശല്യം രൂക്ഷമാകുന്നത്. ചിക്കുൻ ഗുനിയ, ഡെങ്കിപ്പനി, മലേറിയ എന്നിങ്ങനെ കൊതുകുകൾ പരത്തുന്ന രോഗങ്ങളുടെ ലിസ്റ്റ് വളരെ നീണ്ടതാണ്. വീടുകളിൽ നിന്നും അവയെ അകറ്റാൻ പഠിച്ച പതിനെട്ട് പണിയും നമ്മൾ പ്രയോഗിക്കും. എന്നാൽ വളരെ കുറച്ചു കാര്യങ്ങൾ ശ്രദ്ധിച്ചാൽ കൊതുകുകളുടെ വ്യാപനം നമുക്ക് തടയാൻ സാധിക്കും. അത് എന്തൊക്കെയാണെന്ന് നോക്കാം,
കൊതുകുകളെ തടയാൻ ആദ്യം ചെയ്യേണ്ടത് അവ വളരാനുള്ള സാഹചര്യം ഇല്ലാതാക്കുക എന്നതാണ്. കെട്ടി കിടക്കുന്ന വെള്ളം, മലിനജലം, ചിരട്ടകളിലും പ്ലാസ്റ്റിക് കവറുകളിലും പാത്രങ്ങളിലുമൊക്കെ വെള്ളം കെട്ടിക്കിടക്കുന്ന അവസ്ഥ എന്നിവ ഒഴിവാക്കുക. വീടും പരിസരവും വൃത്തിവയായി സൂക്ഷിച്ചാൽ തന്നെ വലിയ ഒരു ശതമാനം കൊതുകുകളുടെ ശല്യം ഒഴിവാക്കാം. കൊതുകുകൾ വീടിനുള്ളിൽ കടക്കാതിരിക്കാൻ അടുക്കളയുടെ ജനാലകളും സൺഷേഡുകളുമടക്കമുള്ളവ കൊതുകു വലകൾ ഉപയോഗിച്ച് മറയ്ക്കുക. വെളുപ്പാൻ കാലത്തും സന്ധ്യ സമയങ്ങളിലും ജനാലകളും വാതിലുകളും തുറന്നിടുന്നത് ഒഴിവാക്കുക. വീടുകളിൽ കുട്ടികളും പ്രായമായവരും ഉണ്ടെങ്കിൽ നിർബന്ധമായും കൊതുകു വലകൾ ഉപയോഗിക്കുക.
വെളുപ്പാൻകാലത്തും സന്ധ്യയ്ക്കുമാണ് കൂടുതലും കൊതുകൾ ശല്യം വ്യാപകമാകുന്നത്. ഈ സമയങ്ങളിൽ സാമ്പ്രാണി, കുന്തിരിക്കം, തുളസിയില എന്നിവ പുകയ്ക്കുക. വീടും പരിസരവും ഫോഗിങ് ചെയ്തും കൊതുകിനെ തുരത്താം. കർപ്പൂരത്തിനൊപ്പം ആര്യവേപ്പില കൂടി ഉണക്കി കത്തിച്ചാൽ കൊതുക് വരില്ല.
കൊതുകു കടിയേൽക്കാതിരിക്കാൻ ലേപനങ്ങളും ക്രീമുകളും പുരട്ടുന്നത് നല്ലതാണ്. വേപ്പില എണ്ണ ശരീരത്ത് പുരട്ടുന്നത് കൊതുക് കടിക്കാതിരിക്കാൻ സഹായിക്കും.
ചെറുനാരങ്ങയിൽ ഗ്രാമ്പൂ കുത്തി മുറികളിൽ വയ്ക്കുന്നത് കൊതുകിനെ തുരത്താൻ നല്ലതാണ്. അതുപോലെതന്നെ, നാരങ്ങയും ഗ്രാമ്പൂവും കറുവപ്പട്ടയും ഇട്ട് തിളപ്പിച്ച വെള്ളം തണുത്തതിന് ശേഷം റൂമിൽ സ്പ്രേ ചെയ്താൽ കൊതുക് ശല്യം ഉണ്ടാവില്ല. വെളുത്തുള്ളി ചതച്ചെടുത്ത് വെള്ളത്തിലിട്ടു ചൂടാക്കിയ ശേഷം മുറിയിൽ തളിച്ചാൽ കൊതുകിനെ അകറ്റാം.
വെള്ളക്കെട്ടുകൾ ഒഴുക്കിക്കളയാൻ കഴിയാത്ത തരത്തിലുള്ളതാണെങ്കിൽ അവിടെ മണ്ണെണ്ണയോ കരിഓയിലോ ഒഴിക്കുക.
