മുംബൈ: ഉദ്ധവ് താക്കറെക്ക് കനത്ത തിരിച്ചടി നൽകി ശിവസേനയുടെ 15 സംസ്ഥാന ഘടകങ്ങളിൽ 12 എണ്ണവും മഹാരാഷ്ട്ര മുഖ്യമന്ത്രി ഏകനാഥ് ഷിൻഡെക്ക് പിന്തുണ പ്രഖ്യാപിച്ചു. ഡൽഹി, മണിപ്പൂർ, മദ്ധ്യപ്രദേശ്, ഛത്തീസ്ഗഢ്, രാജസ്ഥാൻ, ഗോവ, പശ്ചിമ ബംഗാൾ, ത്രിപുര, ഒഡിഷ, ഹൈദരാബാദ്, കർണാടക, ഗുജറാത്ത് സംസ്ഥാന യൂണിറ്റ് ഘടകങ്ങളാണ് ഷിൻഡെക്ക് പിന്തുണ പ്രഖ്യാപിച്ചത്. തങ്ങളുടെ ആദർശം ബാൽ തക്കറെ പകർന്നു നൽകിയ ഹിന്ദുത്വമാണെന്നും, ഇന്ന് അത് കാണാൻ സാധിക്കുന്നത് ഷിൻഡെ പക്ഷത്താണെന്നും സംസ്ഥാന യൂണിറ്റ് അദ്ധ്യക്ഷന്മാർ വ്യക്തമാക്കി.
അതേസമയം, പാർട്ടി സംസ്ഥാന യൂണിറ്റ് അദ്ധ്യക്ഷന്മാരുടെ പിന്തുണയ്ക്ക് നന്ദി അറിയിക്കുന്നതായി മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ പറഞ്ഞു. എല്ലാ സംസ്ഥാനങ്ങളിലെയും ഭാരവാഹികളുമായി നിരന്തരം സമ്പർക്കം പുലർത്തും. വിവിധ സംസ്ഥാനങ്ങളിൽ പാർട്ടിയുടെ വളർച്ചയ്ക്ക് ആവശ്യമായ എല്ലാ സഹായങ്ങളും ചെയ്ത് നൽകുമെന്നും ഷിൻഡെ പറഞ്ഞു.
സംസ്ഥാന ഘടകങ്ങൾ ഷിൻഡെക്കൊപ്പം പോയത് ഉദ്ധവ് താക്കറെക്ക് ഏറ്റ കനത്ത പ്രഹരമായാണ് വിലയിരുത്തപ്പെടുന്നത്. മഹാരാഷ്ട്രയിലെ പഞ്ചായത്ത് തിരഞ്ഞെടുപ്പിൽ ബിജെപിയും ഷിൻഡെ പക്ഷവും തകർപ്പൻ വിജയം നേടിയതും കോൺഗ്രസും എൻസിപിയും ഉദ്ധവ് പക്ഷവും തകർന്നടിഞ്ഞതും പാർട്ടി സംസ്ഥാന ഘടകങ്ങളിൽ വലിയ സ്വാധീനം ചെലുത്തിയതായാണ് വിലയിരുത്തൽ.
Comments