ലോകത്തിലെ രണ്ടാമത്തെ ധനികനും രാജ്യത്തെ വമ്പൻ വ്യവസായിയുമായ ഗൗതം അദാനിയുടെ കമ്പനികളെല്ലാം ഊതി വീർപ്പിച്ച ബലൂണുകൾ മാത്രമാണെന്നും, ശക്തമായ കെട്ടുറപ്പില്ലാത്ത ഈ കമ്പനികൾ വലിയ കടത്തിലാണെന്നുമാണ് വാർത്തകൾ. അതിനാൽ നിക്ഷേപകരിൽ ഭൂരിഭാഗവും സംശയത്തോടെയാണ് അദാനി കമ്പനികളെ കാണുന്നത്. ചില ധനകാര്യ ന്യുസ് വെബ്സൈറ്റുകൾ അദാനി കമ്പനികളുടെ ഷെയറുകൾക്ക് strong Sell ശുപാർശയാണ് നൽകുന്നത്. ഇത്തരമൊരു വാർത്ത കേൾക്കുമ്പോൾ നല്ലൊരു നിക്ഷേപകൻ ചെയ്യേണ്ടത് ആ വാർത്തകൾ തൊണ്ട തൊടാതെ വിഴുങ്ങാതെ, അതിലെ നെല്ലും പതിരും വേർതിരിച്ചു യഥാർത്ഥ വസ്തുത മനസിലാക്കുക എന്നതാണ്. അതിനു ആഴത്തിലുള്ള പഠനം ആവശ്യമാണ്. വെറും Debt equity ratio മാത്രം നോക്കി അദാനി സ്റ്റോക്കുകളെ പുറംകാലുകൊണ്ട് തള്ളിക്കളയുകയല്ല വേണ്ടത്.
അദാനി കമ്പനികൾ ഉയർന്ന കടത്തിലാണെന്ന വസ്തുത എല്ലാവർക്കും അറിയാം. എന്നാൽ നമ്മൾ പരിശോധിക്കേണ്ടത് അത് മാത്രമല്ല, കടം തിരിച്ചടയ്ക്കാനുള്ള ശേഷി കമ്പനിക്ക് ഉണ്ടോ, എത്രകാലം കൊണ്ടാണ് കമ്പനി ആ കടം തിരിച്ചടയ്ക്കേണ്ടത്, എന്ത്തരം കടമാണ് കമ്പനിക്ക് ഉള്ളത്, കമ്പനി എന്ത് ബിസിനസ് ആണ് ചെയ്യുന്നത്, ആ ബിസിനസിനു ദീർഘകാല ക്ഷമതയുണ്ടോ എന്നൊക്കെയാണ്.
കാര്യത്തിലേക്ക് വരാം.
ഒരു കമ്പനിയുടെ കടം തിരിച്ചടവിന്റെ ശേഷി പരിശോധിക്കാൻ ഉപയോഗിക്കുന്ന റേഷ്യോ Debt to EBITDA Ratio ആണ്. ഈ ratio 5 നു മുകളിൽ വരുമ്പോഴാണ് അപകടം മണക്കുന്നത്. അദാനി കമ്പനികളുടെ ശരാശരി Debt to EBITDA ratio നിലവിൽ 4 ന് ചുവടെയാണ്. 2013 ൽ അത് 7 ൽ കൂടുതൽ ആയിരുന്നുവെന്ന് നാം ഓർക്കണം. ഇതിന്റെ അർത്ഥം 2013 ലേക്കാൾ കടം കുറഞ്ഞു എന്നല്ല, വളരെ വേഗത്തിൽ കമ്പനിയുടെ ലാഭം വളരുന്നതിനാൽ EBITDA വളർന്നു എന്നാണ്. ഇത്തരത്തിൽ EBITDA വളരുന്നതിനാൽ കടം തിരിച്ചടക്കാനുള്ള ശേഷിയും വർദ്ധിച്ചു.
ഉദാഹരണത്തിന് കടം തിരിച്ചടയ്ക്കാനുള്ള അദാനി പവറിന്റെയും ടാറ്റ പവറിന്റെയും ശേഷി താരതമ്യം ചെയ്യാം. അദാനി പവറിന്റെ Debt 41555 കോടിയാണ്. ടാറ്റാ പവറിന്റേത് 39708 കോടി. അതായത് അദാനി പവറിന് ഉള്ള കടത്തിനു ഏതാണ്ട് സമമായ കടം തന്നെയാണ് ടാറ്റ പവറിനും ഉള്ളത്. ഇനി കടം തിരിച്ച് അടയ്ക്കാനുള്ള ശേഷി പരിശോധിക്കുന്ന Debt to EBITDA Ratio നോക്കിയാൽ അദാനി പവറിന്റേത് 3.01 ആണ്. എന്നാൽ ടാറ്റ പവറിന്റേത് 4.84 ആണ് . ( ഈ ratio ഉയരുതോറും അപകടം കൂടുതൽ ആണ്). മാത്രമല്ല ടാറ്റ പവറിന്റെ EBITDA growth വെറും 3% മാത്രമാണെങ്കിൽ അദാനി പവറിന്റേത് 30% ആണ്. അതായത് ടാറ്റയുടേതിനേക്കാൾ പതിന്മടങ് വളർച്ച അദാനി പവറിനുണ്ട്. ഇതിൽ നിന്നൊക്കെ ടാറ്റ പവറിനെക്കാൾ മികച്ച തിരിച്ചടവ് ശേഷി അദാനി പവറിന് ഉണ്ടെന്ന് മനസിലാക്കാം.
ശ്രദ്ധിക്കു.. അദാനി കമ്പനികളുടെ ശരാശരി Debt to EBITDA ratio 4നു ചുവടെയാണെന്ന് പറഞ്ഞല്ലോ. ഇത് ശരാശരി മാത്രമാണ്. അതായത് അദാനിയുടെ ചില കമ്പനികൾക്ക് 4 നു മുകളിൽ Debt to EBITDA Ratio ഉണ്ട്. ഉദാഹരണത്തിന് അദാനി ഗ്രീൻ. അദാനി ഗ്രീനിന്റെ Debt EBITDA Ratio 12.18 ആണ്. അതെ വളരെ ഉയർന്ന ratio തന്നെ ആണ് . എന്തുകൊണ്ടാണ് അദാനി ഗ്രീൻ കമ്പനിയിൽ ഇത്രയും കടം ഉണ്ടായത് . അതിനുകാരണം ഇന്ത്യയിലെ മറ്റൊരു ബിസിനസ് giant ഗ്രീൻ എനർജി മേഖലയിൽ ഇറങ്ങുന്നത് കൊണ്ടാണ്. മുകേഷ് അംബാനിയുടെ റിലെൻസുമായി ഏറ്റുമുട്ടുമ്പോൾ ഉള്ള അപകട സാധ്യത മുന്നിൽ കണ്ടാണ് അദാനി ഗ്രീൻ എനർജിയിൽ വൻ നിക്ഷേപം നടത്തിയത്. മാത്രമല്ല 25 വർഷത്തിനു മുകളിലുള്ള പിരീഡിലേക്ക് യുണിറ്റിന് ശരാശരി 2.99 രൂപ നിരക്കിൽ വൈദ്യുതി വിൽക്കാൻ നിരവധി കരാറുകളിലും ഒപ്പിട്ടുകൊണ്ട് അദാനി അംബാനിയെക്കാൾ പത്തു ചുവട് മുന്നേ വെച്ചു ആ മേഖലയിൽ തന്റെ സ്ഥാനം ഭദ്രമായി ഉറപ്പിച്ചു കഴിഞ്ഞു. ഇങ്ങനെയുള്ള കരാറിൽ 89% വും സർക്കാർ സ്ഥാപനങ്ങളുമായതിനാൽ ദീർഘകാല cash flow ഉറപ്പുവരുത്താനും അദാനിക്ക് സാധിച്ചു.
മറ്റൊന്ന്, ഗ്രീൻ എനർജിയുടെ സവിശേഷത അത്തരം കമ്പനികളുടെ Plant & Machinery യുടെ Life of Asset 25 വർഷമാണ് എന്നതാണ് . ഇങ്ങനെയൊരു സവിശേഷത ഉള്ളതിനാൽ one time investment വഴി ദീർഘകാലത്തേക്ക് വരുമാനം ഉറപ്പിക്കാനും സാധിക്കും.
ഇനി അദാനി കമ്പനികളുടെ കടം എവിടെങ്ങളിലാണെന്ന് നോക്കാം.
ഏതാനും വർഷങ്ങൾ മുൻപ് വരെ താരതമ്യേന ഉയർന്ന പലിശയുള്ള പൊതുമേഖല/സ്വകാര്യ ബാങ്കുകളിൽ നിന്നായിരുന്നു അദാനി കടം ഭൂരിഭാഗവും ഉണ്ടായിരുന്നത്, എന്നാൽ അടുത്ത കാലത്ത് പലിശ വളരെ കുറഞ്ഞ മറ്റു വഴി അദാനി തേടുകയും അതിൽ വിജയിക്കുകയും ചെയ്തിരിക്കുന്നു. അതിന്റെ കണക്കുകൾ ചുവടെ കൊടുക്കുന്നു.
31.03.2016 വരെയുള്ള കടം ഇപ്രകാരമാണ്.
PSU Banks 55%
Private Banks 31%
DCM (Bonds) 14%
31.03.2022 വരെയുള്ള കടം ചുവടെ കാണാം.
PSU Banks 25%
Private Banks 8%
DCM (Bonds ) 37%
DII 6%
Global International Bank 18%
PSU Capex LC 6%
മേൽപ്പറഞ്ഞ കണക്ക് പ്രകാരം 2015-16 ൽ അദാനിയുടെ മൊത്തം കടത്തിന്റെ 86% പൊതുമേഖലാ, സ്വകാര്യ ബാങ്കുകളിൽ നിന്നായിരുന്നു. എന്നാൽ ഇന്ന് അത് 33% മാത്രമേയുള്ളു. പലിശ ഉയർന്ന ബാങ്കിംഗ് സ്ഥാപനങ്ങളെ ഒഴിവാക്കി കുറഞ്ഞ പലിശയുള്ള വിദേശ സ്ഥാപനങ്ങളിൽ നിന്നോ അല്ലെങ്കിൽ ബോണ്ട് വഴിയോ കടം എടുക്കുന്ന ബിസിനസ് തന്ത്രം സ്വീകരിച്ചു വിജയിപ്പിക്കാൻ അദാനിക്ക് സാധിച്ചു. (പല ബോണ്ടുകളുടേയും പലിശ 3 മുതൽ 4.37 വരെയാണ്.)
അദാനി കമ്പനികളുടെ കടം തിരിച്ചടയ്ക്കാനുള്ള കാലാവധി നോക്കുകയാണെങ്കിൽ അതും മെച്ചപ്പെട്ടിരിക്കുന്നതായി കാണാം . ഭൂരിഭാഗം അദാനി കമ്പനികളും ദീർഘകാല ആയുസ്സുള്ള ബിസിനസ് നടത്തുന്ന കമ്പനികളാണ്. അതിനാൽ ദീർഘകാലത്തേക്കുള്ള വായ്പയാണ് ആ കമ്പനികൾക്ക് ഗുണം ചെയ്യുക. 2013 വരെ അഞ്ചു വർഷത്തിനുള്ളിൽ തിരിച്ചടയ്ക്കേണ്ട കടങ്ങളായിരുന്നു അദാനി കമ്പനിക്ക് മുഴുവനും ഉണ്ടായിരുന്നത്. എന്നാൽ ഇന്ന് 26% കടം മാത്രമേ 5 വർഷത്തിനുള്ളിൽ അടയ്ക്കേണ്ടതുള്ളു, 84% കടവും ദീർഘകാല വായ്പകളാണ്. 2021 ജൂലൈയിൽ വിദേശ മാർക്കറ്റിൽ നിന്നും 20 വർഷം കാലാവധിയുള്ള 750 million ഡോളർ (ഏതാണ്ട് 6000 കോടി ഇന്ത്യൻ രൂപ ) ബോണ്ട് ഇഷ്യു ചെയ്യാൻ അദാനി പോർട്ടിനു സാധിച്ചു. ആഗോള മാർക്കറ്റിൽ 20 വർഷം കാലാവധിയുള്ള ബോണ്ട് ഇഷ്യൂ ചെയ്ത ഇന്ത്യയിലെ ആദ്യ infrastructure കമ്പനി അദാനി പോർട്ട് ആണ്.
അദാനി കമ്പനികളുടെ 5 വർഷത്തിനുള്ളിൽ അടയ്ക്കേണ്ടിയിരുന്ന കടങ്ങളുടെ ശതമാന കണക്കുകൾ വർഷം തിരിച്ചു ചുവടെ കൊടുക്കുന്നു.
2013 ൽ 100%
2016 ൽ 86%
2022 ൽ 26%
ഇനി അദാനി ചെയ്യുന്ന ബിസിനസ് ഏതൊക്കെ മേഖലകളിൽ ആണെന്ന് നോക്കു. ദീർഘകാലത്തോളം ബിസിനസ് ചെയ്യാൻ സാധിക്കുന്ന, വമ്പൻ വളർച്ചാ സാധ്യതയുള്ള സെക്ടറുകളിലാണ് അദാനിയുടെ കമ്പനികൾ പ്രവർത്തിക്കുന്നത്. പോർട്ട്, തുറമുഖം, എയർപോർട്ട്, എനർജി, ഗ്യാസ് തുടങ്ങിയവയെല്ലാം ദീർഘകാലത്തോളം പ്രവർത്തിക്കാൻ ആവശ്യമായ ലൈസൻസ് ലഭിക്കുകയോ അല്ലെങ്കിൽ കരാറിൽ ഏർപ്പെടുകയോ ചെയ്തിട്ടുണ്ട്. ഇന്ത്യയിലെ LPG ഗ്യാസ് വിതരണം പൂർണമായും പൈപ്പ് ലൈനിലേക്ക് മാറാൻ പോവുകയാണ്, അത് ഉപയോഗപ്പെടുത്താൻ അദാനി ടോട്ടൽ ഗ്യാസ് ഉണ്ട്. അടിസ്ഥാന സൗകര്യ വികസനത്തിനു സർക്കാർ വൻ തുക ചെലവഴിക്കുകയാണ്, ആ മേഖലയിൽ കണ്ണ് നട്ട് അദാനി എന്റെർപ്രൈസ് പ്രവർത്തിക്കുന്നു.
അത് കൂടാതെ അംബുജ, ACC എന്നീ സിമന്റുകളെ അദാനി ഏറ്റെടുത്തു. ഇന്ത്യയിലെ പെർ ക്യാപിറ്റ സിമന്റ് ഉപയോഗം 250 KG ആണ്. ചൈനയുടേത് 1600 kg യും. ഈ 250 kg വർദ്ധിച്ച് 1200 kg യിലേക്ക് കടക്കുമെന്ന് ബിസിനസ് ലോകം കണക്കു കൂട്ടുന്നു . ആ സാധ്യത മുന്നിൽ കണ്ടാണ് അംബുജ, ACC സിമന്റുകളെ അദാനി ഏറ്റെടുത്തത്. മേൽപ്പറഞ്ഞ സിമന്റ് കമ്പനികളുടെ ഉത്പാദനം അഞ്ചു വർഷം കൊണ്ട് ഇരട്ടിയാക്കുമെന്ന് അദാനി പ്രഖ്യാപിച്ചു കഴിഞ്ഞു. ഇന്ത്യയിൽ പുതിയ 250 വിമാന താവളങ്ങൾക്ക് സ്കോപ് ഉണ്ട്. അതിൽ ഭൂരിഭാഗവും ( നിർമ്മാണം അല്ലെങ്കിൽ നടത്തിപ്പ് ) അദാനി എന്റർപ്രൈസസ് തന്നെ ലഭിക്കാനാണ് സാധ്യത. ഇത്തരത്തിൽ അദാനിയുടെ ഓരോ കമ്പനിയും എടുത്തു പരിശോധിച്ചാൽ എല്ലാം തന്നെ ഹൈ potential ഉള്ള മേഖലയിൽ ആണ് ബിസിനസ് ചെയ്യുന്നതെന്ന് മനസിലാക്കാം.
ചുരുക്കി പറഞ്ഞാൽ അദാനി തുടങ്ങിയട്ടേയുള്ളു. യഥാർത്ഥ വളർച്ച ഇനി കാണാൻ പോകുന്നതേയുള്ളു.
Comments