കോഴിക്കോട് : വീണ്ടും വിവാദ പ്രസ്താവനയുമായി മുസ്ലീം ലീഗ് നേതാവ് എംകെ മുനീർ. സ്വവർഗാനുരാഗികൾ അക്രമകാരികളാണെന്ന് മുനീർ ആരോപിച്ചു. അവർക്കെതിരെ സംസാരിച്ചാൽ അവർ അടിച്ചുപൊളിക്കും. മതങ്ങളൊന്നും തന്നെ സ്വവർഗാനുരാഗത്തെ അംഗീകരിക്കില്ലെന്നും മുനീർ പറഞ്ഞു. പേരാമ്പ്രയിലെ മുസ്ലീം ലീഗ് വേദിയിലായിരുന്നു മുനീറിന്റെ വിവാദ പരാമർശം.
എൽജിബിടിക്കെതിരെ സംസാരിക്കുന്നവരെ ഭ്രാന്തന്മാരാക്കി മാറ്റുകയാണ്. എൽജിബിടിയെ എതിർത്തതിന് പുരോഗമനവാദികൾ തനിക്കെതിരെ തിരിഞ്ഞു എന്നാണ് മുനീറിന്റെ ആരോപണം.സ്വവർഗാനുരാഗം മുസ്ലീങ്ങളുടെ മാത്രം പ്രശ്നമല്ല. എല്ലാ മതങ്ങളും അതിനെ എതിർക്കുന്നുണ്ട്. സ്ത്രീകളുടെ പേര് പറഞ്ഞ് പുരുഷ മേധാവിത്വം അടിച്ചേൽപ്പിക്കാനാണ് ശ്രമം.
നേരത്തെയും ഇത്തരത്തിലുള്ള വിവാദ പരാമർശങ്ങളുമായി എംകെ മുനീർ രംഗത്തെത്തിയിട്ടുണ്ട്.
ലിംഗസമത്വമെങ്കിൽ ആൺകുട്ടി മുതിർന്ന പുരുഷനുമായി ലൈംഗികമായി ബന്ധപ്പെട്ടാൽ പോക്സോ കേസ് എടുക്കുന്നത് എന്തിനാണ് എന്നാണ് മുനീർ ചോദിച്ചത്. മതമൂല്യങ്ങളെ തകർക്കുന്നതാണ് ജെൻഡർ ന്യൂട്രാലിറ്റിയെന്നും ജെൻഡർ ന്യൂട്രാലിറ്റി വന്നാൽ ആൺകുട്ടികൾ ദുരുപയോഗം ചെയ്യപ്പെടുമെന്നും മുനീർ ആരോപിച്ചിരുന്നു.
