ഈരാറ്റുപേട്ടയിൽ ലഹളയ്‌ക്ക് ശ്രമം; നഗരത്തിൽ സംഘടിച്ച പോപ്പുലർഫ്രണ്ട് പ്രവർത്തകരെ അടിച്ചോടിച്ച് പോലീസ്

കോട്ടയം: ഈരാറ്റുപേട്ടയിൽ ലഹളയ്‌ക്കുള്ള പോപ്പുലർഫ്രണ്ട് പ്രവർത്തകരുടെ ശ്രമം തടഞ്ഞ് പോലീസ്. പ്രവർത്തകരെ അടിച്ചോടിച്ചു. അഞ്ച് പ്രവർത്തകരെ പോലീസ് കസ്റ്റഡിയിൽ എടുത്തിട്ടുണ്ട്. അതേസമയം ഹർത്താലിന്റെ മറവിൽ പോപ്പുലർഫ്രണ്ട് പ്രവർത്തകർ സംസ്ഥാന വ്യാപകമായി അഴിഞ്ഞാടുകയാണ്.

രാവിലെ ഏഴ് മണിയോടെയാണ് ഈരാറ്റുപേട്ട നഗരത്തിൽ പോപ്പുലർഫ്രണ്ടുകാർ സംഘടിച്ചത്. മുദ്രാവാക്യം വിളികളുമായി ഏറെ നേരം നഗരത്തിൽ സംഘടിച്ച ഇവർ പിന്നീട് ഗതാഗതം തടസ്സപ്പെടുത്തുകയായിരുന്നു. തുടർന്ന് പോലീസ് ഇടറോഡിലൂടെ വാഹനയാത്രികർക്ക് കടന്ന് പോകാൻ സൗകര്യമുണ്ടാക്കി. എന്നാൽ ഇതിനിടെ അവിടേക്ക് എത്തിയ ബൈക്ക് യാത്രികനെ തടഞ്ഞ പ്രവർത്തകർ മർദ്ദിക്കുകയായിരുന്നു. ഇതോടെയാണ് പോലീസ് ലാത്തി വീശിയത്.

ലാത്തി ചാർജിൽ പ്രതിഷേധിച്ച് പോപ്പുലർഫ്രണ്ടുകാർ നഗരത്തിലെ റോഡിൽ കുത്തിയിരുന്ന പ്രതിഷേധിക്കുകയാണ്. നഗരത്തിൽ ഗതാഗതം തടസ്സപ്പെടുത്തിയാണ് പ്രതിഷേധ പ്രകടനം. നഗരത്തിലേക്ക് കൂടുതൽ പ്രവർത്തകർ എത്തുന്നുണ്ട്.