പ്രഖ്യാപന നാളുകൾ മുതൽ ആരാധകർ സ്വീകരിച്ച സുരേഷ് ഗോപി ചിത്രമാണ് മേ ഹൂം മൂസ . ചിത്രവുമായി ബന്ധപ്പെട്ട വിശേഷങ്ങൾ സുരേഷ് ഗോപിയും അണിയറ പ്രവർത്തകരും പുറത്ത് വിടാറുമുണ്ട്. ഇതിന്റെ ഭാഗമായി മുമ്പ് കേരളത്തിൽ നിന്നുള്ള മൂസയുടെ ചിത്രങ്ങൾ പുറത്ത് വന്നിരുന്നു. ഇപ്പോഴിതാ ഉത്തരേന്ത്യൻ ഗ്രാമങ്ങളിലൂടെ അലഞ്ഞു നടക്കുന്ന മൂസയുടെ ചിത്രങ്ങളും അണിയറ പ്രവർത്തകർ പുറത്ത് വിട്ടിരിക്കുകയാണ്.
മൂസയിലെ പുതിയ ചിത്രങ്ങൾ പുറത്ത് വന്നതോടെ ആരാധകർ എല്ലാം തന്നെ ആകാംക്ഷയിലായിരിക്കുകയാണ്. തികച്ചും ഒരു സാധാരണക്കാരനായാണ് സുരേഷ് ഗോപി ചിത്രത്തിൽ എത്തുന്നത്. എന്തിനയോ മൂസ തിരയുന്നു എന്ന തരത്തിലാണ് ചിത്രങ്ങൾ പങ്കുവയ്ക്കപ്പെട്ടിരിക്കുന്നത്. മലപ്പുറം സ്വദേശിയായി എത്തുന്ന മൂസ കിലോ മീറ്ററുകളോളം നടക്കുകയും വൃഷത്തണലിലും കടത്തിണ്ണകളിലും കിടന്നുറങ്ങുന്നതും ചിത്രങ്ങളിൽ വ്യക്തമാണ്.
ദില്ലി ,ജയ്പൂർ, പുഞ്ച്, വാഗാ ബോർഡർ, എന്നിവിടങ്ങളിലായാണ് മേ ഹൂം മൂസയുടെ ഉത്തരേന്ത്യൻ രംഗങ്ങൾ ചിത്രീകരിച്ചത്. വെള്ളിമൂങ്ങ എന്ന വിജയ ചിത്രത്തിനു ശേഷം ജിബു ജേക്കബ് സംവിധാനം ചെയ്ത സിനിമയാണ് ‘മേം ഹൂ മൂസ’. നിരവധി പ്രത്യേകതകളുള്ള സിനിമയിൽ വ്യത്യസ്ത രൂപങ്ങളിലാണ് സുരേഷ് ഗോപി പ്രത്യക്ഷപ്പെടുന്നത്. മലപ്പുറം സ്വദേശിയായ മൂസ എന്ന മുൻ പട്ടാള ഉദ്യോഗസ്ഥന്റെ വേഷമാണ് സുരേഷ് ഗോപിയുടേത്. 1998 മുതൽ 2019 വരെയുള്ള കാലഘട്ടമാണ് സിനിമയുടെ പശ്ചാത്തലം.
ഇന്ത്യയിലെ സമകാലിക സംഭവങ്ങൾ കടന്നുവരുന്ന ഒരു പാൻ ഇന്ത്യൻ സിനിമയുടെ ജോണറിൽപ്പെടുത്താവുന്ന ചിത്രമാണ് ‘മേം ഹൂ മൂസ’എന്ന് സംവിധായകൻ മുമ്പ് പറഞ്ഞിരുന്നു.ജോണി ആന്റണി, സൈജു കുറുപ്പ്, ഹരീഷ് കണാരൻ, മേജർ രവി, മിഥുൻ രമേശ്, ശശാങ്കൻ മയ്യനാട്, കണ്ണൻ സാഗർ, അശ്വിനി, സരൺ, ജിജിന, ശ്രിന്ദ തുടങ്ങിയവർ മറ്റു കഥാപാത്രങ്ങളെ അവതരിപ്പിച്ചിരിക്കുന്നു
