തിരുവനന്തപുരം: പോപ്പുലർ ഫ്രണ്ട് കേന്ദ്രങ്ങളിൽ ദേശീയ അന്വേഷണ ഏജൻസി നടത്തുന്ന റെയ്ഡുകൾ ഏകപക്ഷീയമാണെന്ന് പറഞ്ഞ എം.പി എ.എം. ആരിഫിനെ കടന്നാക്രമിച്ച് കുമ്മനം രാജശേഖരൻ. പോപ്പുലർ ഫ്രണ്ടിന്റെ താവളങ്ങളിൽ നടന്ന മിന്നൽ പരിശോധന കഴിഞ്ഞതോടെ അവരുടെ സ്ലീപ്പിംഗ് സെല്ലുകൾ ഉണർന്നു തുടങ്ങിയെന്ന് എ.എം. ആരിഫിനെ വിമർശിച്ച് കുമ്മനം രാജശേഖരൻ പറഞ്ഞു. റെയ്ഡിന് പിന്നാലെ ചില നേതാക്കൾ പെട്ടെന്നു തന്നെ കൂറു കാട്ടി രംഗത്തിറങ്ങി കഴിഞ്ഞു. ആരിഫ് എം.പിയിൽ നിന്നും കേട്ടത് അത്തരം ശബ്ദമാണെന്ന് അദ്ദേഹം വ്യക്തമാക്കി.
പോപ്പുലർ ഫ്രണ്ട് കേന്ദ്രങ്ങളിൽ നടന്ന റെയ്ഡിനെ വിമർശിച്ച് ആദ്യം രംഗത്തെത്തിയ സി.പി.എം നേതാവാണ് ആരിഫ്. പോപ്പുലർ ഫ്രണ്ടിന്റെ ആശയങ്ങളോടുള്ള പ്രതിബദ്ധത വെളിപ്പെടുത്തുന്നതാണ് ആരിഫിന്റെ വാക്കുകൾ. ഏകപക്ഷീയമായ റെയ്ഡാണ് പോപ്പുലർ ഫ്രണ്ട് കേന്ദ്രങ്ങളിൽ നടന്നതെന്നാണ് എംപി പറയുന്നത്. ഇന്ന് പോപ്പുലർ ഫ്രണ്ട് കേന്ദ്രങ്ങളിലാണ് കേന്ദ്ര ഏജൻസികൾ റെയ്ഡിന് എത്തിയതെങ്കിൽ നാളെ എത്തുക സി.പി.എം ഓഫീസുകളിലായിരിക്കുമെന്നാണ് ആരിഫ് പ്രവചിച്ചിരിക്കുന്നതെന്നും കുമ്മനം രാജശേഖരൻ വിമർശിച്ചു.
പോപ്പുലർ ഫ്രണ്ടും സിപിഎമ്മും സമാന സ്വഭാവം പുലർത്തുന്നവയാണെന്നാണ് ആരിഫിന്റെ വാക്കുകളിൽ നിന്നും മനസ്സിലാക്കേണ്ടത്. തീവ്രവാദ സംഘടനയായ പോപ്പുലർ ഫ്രണ്ടുമായി മുൻ കാലങ്ങളിൽ രഹസ്യ ചങ്ങാത്തമുണ്ടാക്കിയിട്ടുണ്ടെങ്കിലും പരസ്യമായി അവരെ വെള്ള പൂശാൻ സിപിഎം ഇതുവരെ കൂട്ടാക്കിയിരുന്നില്ല. പോപ്പുലർ ഫ്രണ്ട് തീവ്രവാദ സംഘടനയാണെന്ന് മുതിർന്ന നേതാവ് വി.എസ് അച്യുതാനന്ദൻ പറഞ്ഞത് ആരിഫ് മറന്നു പോയാലും മറ്റു നേതാക്കൾ ഓർക്കുന്നുണ്ടാവും. പോപ്പുലർ ഫ്രണ്ട് റെയ്ഡിനെപ്പറ്റി ആരിഫിന്റെ അഭിപ്രായം തന്നെയാണോ സിപിഎമ്മിന്റേത് എന്ന് വ്യക്തമാക്കണമെന്നും കുമ്മനം രാജശേഖരൻ ആവശ്യപ്പെട്ടു.
