ന്യൂഡൽഹി : ഇന്ത്യൻ ആംഗ്യഭാഷ നിഘണ്ടു മൊബൈൽ ആപ്ലിക്കേഷൻ പുറത്തിറക്കി കേന്ദ്രം . 10,000 വാക്കുകൾ അടങ്ങിയ ‘സൈൻ ലേൺ’ എന്ന ആപ്ലിക്കേഷനാണ് പുറത്തിറക്കിയിരിക്കുന്നത്. സാമൂഹ്യനിതീ വകുപ്പ് മന്ത്രി പ്രതിമ ഭൂമിക് ആണ് ആപ്പ് പുറത്തിറക്കിയത്.
ഇന്ത്യൻ ആംഗ്യഭാഷാ ഗവേഷണ പരിശീലന കേന്ദ്രത്തിന്റെ നിഘണ്ടു അടിസ്ഥാനമാക്കിയുള്ളതാണ് ആപ്ലിക്കേഷൻ. ആൻഡ്രോയിഡ്, ഐഒഎസ് പതിപ്പുകളിൽ എല്ലാം തന്നെ ആപ്പ് ലഭ്യമാകും. ഇതിന് പുറമെ ഹിന്ദിയിലും ഇംഗ്ലീഷിലും ഐഎസ്എൽ നിഘണ്ടുവിലെ എല്ലാ വാക്കുകളും പരിശോധിക്കാനും സാധിക്കും. ആപ്പിന്റെ പ്രവർത്തനം ആളുകളിലേക്ക് എത്തിക്കുന്നതിനായി സൈൻ വീഡിയോകൾ അധികൃതർ സമൂഹമാദ്ധ്യമങ്ങളിൽ പങ്കുവയ്ക്കും.
ഐഎസ്എൽ നിഘണ്ടു പൊതുജനങ്ങൾക്ക് എളുപ്പത്തിൽ ലഭ്യമാക്കുന്നതിന് വേണ്ടിയാണ് ആപ്പ് വികസിപ്പിച്ചിരിക്കുന്നതെന്ന് മുതിർന്ന ഉദ്യോഗസ്ഥൻ പറഞ്ഞു. 1 മുതൽ 12 വരെയുള്ള ക്ലാസുകളിലെ എൻസിആർടിസി പുസ്തകങ്ങൾ ആംഗ്യഭാഷയിലേക്ക് പരിവർത്തനം ചെയ്യുന്നതിനായി അധികൃതർ ധാരണാപത്രം ഒപ്പുവെച്ചിരുന്നു. നാഷണൽ കൗൺസിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിംഗുമായി ഐഎസ്എൽആർസിയാണ് ഈ ധാരണാപത്രം ഒപ്പുവച്ചത്. ആറാം ക്ലാസിലെ എൻസിഇആർടി പാഠപുസ്തകങ്ങളുടെ ഐഎസ്എൽ ഇ ഉള്ളടക്കം ഈ വർഷം പുറത്തിറക്കിയതായും അദ്ദേഹം കൂട്ടിച്ചേർത്തു.
ഇതിന് പുറമെ നാഷണൽ ബുക്ക് ട്രസ്റ്റിന്റെ വീർഗത പരമ്പരയിലെ തിരഞ്ഞെടുത്ത പുസ്തകങ്ങളുടെ ഐഎസ്എൽ പതിപ്പുകൾ കേന്ദ്രം പുറത്തിറക്കിയിരുന്നു. ആസാദി കാ അമൃത് മഹോത്സവത്തിന് കീഴിലായിരുന്നു ഈ പുസ്തകങ്ങളുടെ ഐഎസ്എൽ പതിപ്പ് പുറത്തിറക്കിയത്. കൂടാതെ ഐഎസ്എൽആർടിസിയും എൻസിഇആർടിയും ചേർന്ന് ഇന്ത്യൻ ആംഗ്യഭാഷയിൽ 500 അക്കാദമിക് വാക്കുകളാണ് പുറത്ത് ഇറക്കിയിരിക്കുന്നത്. ചരിത്രം, ശാസ്ത്രം, രാഷ്ട്രമീമാംസ, ഗണിതശാസ്ത്രം എന്നിവയിൽ വരുന്ന വാക്കുകൾ സെക്കൻഡറി തലത്തിലാണ് ഉപയോഗിക്കുന്നതെന്നും അദ്ദേഹം വ്യക്തമാക്കി.
Comments