എറണാകുളം: ഭീകരവാദ പ്രവർത്തനങ്ങൾ നടത്തിയതായി കണ്ടെത്തിയതിന്റെ പേരിൽ എൻഐഎ അറസ്റ്റ് ചെയ്ത പോപ്പുലർഫ്രണ്ട് പ്രവർത്തകരെ കസ്റ്റഡിയിൽ വിട്ടു. ഏഴ് ദിവസത്തേക്കാണ് എൻഐഎ പ്രത്യേക കോടതി പ്രതികളെ കസ്റ്റഡിയിൽ വിട്ടത്. ഇവരെ ഈ മാസം 30 ന് വീണ്ടും കോടതിയിൽ ഹാജരാക്കും.
കൂടുതൽ വിവരങ്ങൾക്കായി പ്രതികളെ വിശദമായി ചോദ്യം ചെയ്യേണ്ടതുണ്ടെന്നും, അതിനാൽ ഏഴ് ദിവസത്തെ കസ്റ്റഡിയിൽ വേണമെന്നും എൻഐഎ ആവശ്യപ്പെട്ടിരുന്നു. ഈ ആവശ്യം പരിഗണിച്ചാണ് കസ്റ്റഡിയിൽ വിട്ടത്. തങ്ങൾ കുറ്റക്കാരല്ലെന്നും, അറസ്റ്റ് രാഷ്‌ട്രീയ വിരോധമാണെന്നും പ്രതികൾ പറഞ്ഞെങ്കിലും ഈ വാദങ്ങൾ കോടതി തള്ളുകയായിരുന്നു.
ഹാജരാക്കാൻ കൊണ്ടുവരുന്നതിനിടെ കോടതി വളപ്പിൽ ബോലോ തക്ബീർ മുഴക്കി പ്രതികൾ പ്രതിഷേധിച്ചിരുന്നു. ഇതിൽ പ്രവർത്തകരെ രൂക്ഷമായി വിമർശിച്ച കോടതി ഇത് ആവർത്തിക്കരുതെന്നും താക്കീത് നൽകി. സുപ്രീംകോടതിയുടെ നിർദ്ദേശങ്ങൾ പാലിച്ചാകണം ചോദ്യം ചെയ്യലും മറ്റ് നടപടിക്രമങ്ങളെന്നും അന്വേഷണ സംഘത്തോട് നിർദ്ദേശിച്ചിട്ടുണ്ട്.
രാജ്യവിരുദ്ധ പ്രവർത്തനങ്ങളിൽ പങ്കുള്ളതായി കണ്ടെത്തിയതിനെ തുടർന്ന് 11 പോപ്പുലർഫ്രണ്ട് പ്രവർത്തകരെയാണ് എൻഐഎ അറസ്റ്റ് ചെയ്തത്. വരും ദിവസങ്ങളിൽ ഇവരെ വിവിധയിടങ്ങളിൽ എത്തിച്ച് തെളിവെടുപ്പ് നടത്തും.
